«Արմենիկում» դեղամիջոցը միջազգային շրջանակներում կարող է ունենալ հեղինակություն այն դեպքում, երբ որ ապացուցվի դրա արդյունավետությունը, եւ քանի որ «Արմենիկում»-ի արդյունավետությունն ապացուցված է ՁԻԱՀ-ով հիվանդների համեմատաբար փոքր շրջանում, այդ իսկ պատճառով այն ընդունված է, սակայն ընդունված է, որպես նախնական տվյալ: Այս մասին NEWS.am- Ինովացիայի թղթակցի հետ հարցազրույցում ասաց «Արմենիկում» կլինիկական կենտրոնի հետազոտական լաբորատորիայի վարիչ, կենսաբանական գիտությունների դոկտոր Տիգրան Դավթյանը` ավելացնելով, որ իրենք հաջողվել է հանրագումարի բերել մոտավորապես 120-150 հիվանդների տվյալները, որոնք ներկայացվել են միջազգային գիտական հանդեսներում եւ կոնֆերանսներում:
«Արմենիկումը» ընդունված է, սակայն ընդունված է որպես նախնական արդյունք, իսկ որպեսզի ապացուցվի դեղամիջոցի էֆեկտիվությունը, պետք է կատարվեն շատ ավելի լայն կլինիկական փորձարկումներ` շատ ավելի մեծ թվով հիվանդների խմբեր ընդգրկելով» ,-ասաց Դավթյանը: Մեծ թվով հիվանդների շրջանում հետազոտություններ կատարելուց բացի, Դավթյանի խոսքով` անհրաժեշտ է կատարել համակցված ուսումնասիրություններ` ուսումնասիրել արդեն ընդունված դեղամիջոցների եւ «Արմենիկում»-ի համատեղ ազդեցությունը:
«Մինչեւ այս ամենը չարվի եւ այս հետազոտությունները չկատարվեն միջազգային որեւէ կազմակերպություն, որեւէ մի երկիր լիարժեք չի կարող գրանցել «Արմենիկումը» որպես հակամիավ ազդեցությամբ դեղամիջոց»,-ասաց Դավթյանը:
Նրա խոսքով` այժմ մի շարք երկրներում` Ռուսաստանում, Ուկրաինայում, Աֆրիկայում եւ Հնդկաստանում «Արմենիկումը» ունի հեղինակություն եւ գրանցված/ճանաչված է որպես հակաբորբոքային եւ իմունամոդուլյատոր (իմուն կարգավորիչ) դեղամիջոց:
«12-15 տարին շատ քիչ ժամանակահատված է, որպեսզի դեղամիջոցը լիովին մտնի կյանք, բայց, այդուամենայնիվ «Արմենիկումը» արդեն իսկ բավականին ճանաչված դեղորայք է»,- ասաց Դավթյանը:
