Հայոց ցեղասպանության 100-րդ տարելիցի առթիվ Բեռնի Կազինոպլաց հրապարակում տեղի կունենա բողոքի ցույց, որի կարգախոսը կլինի «1915-2015. Ժխտման 100 տարի, բավակա'ն է»։ Ակցիայի ժամանակ մասնակիցները կհարգեն հայերի, հույների ու ասորիների ցեղասպանությունների զոհերի հիշատակը, գրում է «Nouvelles d'Arménie»-ն։
Ակցիայի մասնակիցները կպնդեն, որ չի կարող լինել հաշտություն առանց Թուրքիայի կողմից ցեղասպանության ճանաչման։ Նշվում է, որ 100 տարի անց հայտնվել է նույն սպառնալիքը, եւ ակցիայի մասնակիցները կոչ կանեն դադարեցնել քրիստոնյաների ցեղասպանությունը Սիրիայում եւ Իրաքում։ Ակցիայից հետո Բեռնի տաճարում համերգ կկայանա։