News
Լրահոս
News
Ուրբաթ
Հուլիս 01
USD
407.21
EUR
423.54
RUB
7.75
Տեսնել լրահոսը


Գյումրեցի Քարտաշյանները, որոնք համոզված են, որ ամերիկահայ հայտնի հեռուստաաստղ Քիմ Քարդաշյանի հեռավոր ազգականներն են, հուսով են, որ Քարդաշյանների ընտանիքի` Հայաստան առաջիկա այցի ժամանակ նրանց հանդիպելու հնարավորություն կունենան: 70-ամյա Մարտուն Քարտաշյանը NEWS.am-ի հետ զրույցում ասաց, որ հայտնի աստղի` Հայաստան ժամանելու մասին երկու օր առաջ է իմացել: 

«Բարեկամներիցս մեկը զանգեց, ասեց` աչքդ լույս, ազգականդ գալիս է Հայաստան: Ես զարմացա ու միեւնույն ժամանակ, ուրախացա: Թեեւ հիվանդ եմ, սակայն ինքս պատրաստ եմ գնալու նրա հետ հանդիպման, եթե նա ժամանակ գտնի ինձ ընդունելու: Միայն թե  պարզեմ` ում դուստրը կամ թոռն է»,- ասաց Մարտուն Քարտաշյանը:

Մարտուն պապը Գյումրիում է ծնվել, ծնողների պատմելով գիտի, որ նախնիները Կարսից են այնտեղ գաղթել: Գիտի, որ Քարտաշյաններ բնակվել են նաեւ ԱՄՆ-ում, այդ պատճառով էլ վստահ է, որ հայտնի հեռուստաստղի հայրն իր ազգականն է եղել:

«Հայրս ասում էր, որ եղբայրներ  ունի, բայց ես նրանց չեմ հիշում: Պապիկիս եղբայրների մասին էլ եմ լսել, նրանք շատ եղբայրներ են եղել, բայց սպանվել են թուրքերի ձեռքով: Տարիների ընթացքում Քարտաշյանները սփռվել են աշխարհով մեկ»-, ասաց Մարտուն Քարտաշյանը:

Մարտուն պապը պատմեց, որ Քարտաշյաններից ոմանք Վանաձորում են բնակվել, սակայն  վաղուց մահացել են: Քարտաշյաններն այժմ հիմնականում ապրում են Գյումրիում, մի մասն էլ`  Արթիկում:

Մարտուն Քարտաշյանն իր չորս եղբայրներից ամենակրտսերն է, ավագ եղբայրները մահացել են, մեկ քույր ունի, որն ապրում է Երեւանում:

Հիշեցնենք, որ թատերագետ Լեւոն Մութաֆյանը NEWS.am-ի հետ զրույցում ասել էր, որ Գյումրիում ճանաչում է Քարտաշյանների, որոնք բարեկամ են հայտնի Քարդաշյաններին։ Ըստ Լեւոն Մութաֆյանի` Քարդաշյանի պապը եւ այդ ընտանիքի պապը հորեղբոր որդիներ են եղել։

Նշենք, որ Քիմ Քարդաշյանի՝ Հայաստան այցի ընթացքում նախատեսվում է նկարահանումներ անել Keeping up with Kardashians ռեալիթի-շոուի համար։ Նկարահանումների մի մասը կիրականացվի Գյումրիում:

!
Այս նյութը հասանելի է նաև   English, Русский and Türkçe
Տպել
Ամենաշատ
Ֆոտոռեպորտաժներ