Մոսկվայի Տրոիցկի շրջանի դատարանի կողմից մեղավոր ճանաչված եւ 6 տարի 9 ամսվա բանտարկության դատապարտված Հրաչյա Հարությունյանին Հայաստան տեղափոխելու հարցով որեւէ նորություն չկա: Այս մասին NEWS.am-ի թղթակցի հետ զրույցում ասաց Հրաչյա Հարությունյանի աները՝ Վիկտոր Մարտիրոսյանը:
Նա նշեց, որ առայժմ պատասխան չկա Ռուսաստանի Դաշնության Արդարադատության նախարարին ուղարկված նամակից «Ոչ մի նորություն չկա, սպասում ենք արդարադատության նախարարությանը, երեկ էլ զանգեցի, ասացին՝ շուտով նորություն կլինի, չգիտեմ՝ դա երբ է, ժամկետներ չեն ասում»,-ասաց Վիկտոր Մարտիրոսյանը:
Նա նշեց, որ շուտով կլրանա 6 ամիսը, ինչ դիմել է Արդարադատության նախարարությանը: Հրաչյա Հարությունյանի աները նշեց նաեւ, որ չեն կարողանում խոսել Հրաչյայի հետ, փաստաբանն էլ զանգերին չի պատասխանում:
Հարցմամբ դիմեցինք նաեւ արդարադատության նախարարությանը, որտեղից խոստացել են լրացուցիչ պարզաբանումներ տալ:
Հիշեցնենք, որ բեռնատարը, որի ղեկին եղել է Հրաչյա Հարությունյանը, 2013 թվականի հուլիսի 13-ին մխրճվել է Պոդոլսկից դեպի Կուրիլովո 64 ուղեւորի փոխադրող ավտոբուսի մեջ: Վթարի հետեւանքով 18 մարդ զոհվել է, ավելի քան 40-ը՝ վիրավորվել:
Հետաքննության արդյունքում պարզվել է, որ բեռնատարը հարկ եղածի պես չի սպասարկվել, ինչի արդյունքում արգելակման հետ կապված խնդիրներ է ունեցել: Ըստ հետաքննության, Հարությունյանը պետք է իմանար այդ մասին: Մոսկվայի քաղաքային դատարանը Հրաչյա Հարությունյանին դատապարտել է 6 տարի եւ 9 ամիս ժամկետով ազատազրկման: Մոսկվայի քաղաքային դատարանըանփոփոխ է թողել այդ դատավճիռը:
