Ամերիկահայ հեռուստաաստղ Քիմ Քարդաշյանի հայաստանյան այցը անհանգստացրել է թուրքական լրատվամիջոցներին։

Թուրքական Sabah-ը գրել է, թե Քիմ Քարդաշյանը Հայոց ցեղասպանության 100-րդ տարելիցին առաջին անգամ ամուսնու եւ դստեր հետ Հայաստան է այցելել։

Թուրքական Haberturk-ը Քիմի մասին հրապարակումը վերնագրել է. «Ցեղասպանության 100-րդ տարելիցին Քարդաշյանի այցին մեծ հետաքրքրություն կա»։  Պարբերականը գրել է, որ Քիմ Քարդաշյանը հայտնել է, որ Հայաստանում իր այցի մանրամասները ցուցադրվելու է Keeping Up With Kardashian շոու ծրագրում։

Cumhurıyet-ը եւս անդրադարձել է Քարդաշյանների ընտանիքի այցին՝ գրելով, որ Քարդաշյան քույրերը հանդիպել են Հայաստանի վարչապետի հետ եւ խոստացել շարունակել պայքարել Ցեղասպանության ճանաչման համար։ 

Թուրքական Rotahaber կայքն էլ շեշտել է, որ Ցեղասպանության 100-րդ տարելիցին Հայաստան մեկնած Քիմ Քարդաշյանը Հայոց ցեղասպանության մասին վավերագրական ֆիլմ է պատրաստելու։

Superhabertv կայքն էլ գրել է, որ Քիմ Քարդաշյանը այցելելու է Հայոց ցեղասպանության հուշահամալիր, ինչը կարող է ԱՄՆ հեռուստաալիքներով Ցեղասպանության ճանաչման քարոզչություն լինել։