Լոռու մարզի Սպիտակի ոլորաններում այսօր՝ ապրիլի 17-ին,  պաշտպանության նախարարության հաշվեկշռում գրանցված «Ուրալ» մակնիշի զինվորական ավտոմեքենայի վթարի հետեւանքով մեկ մարդ մահացել է, եւս յոթ անձինք վիրավորվել են։

ՏԿԱԻՆ մամուլի ծառայության փոխանցմամբ, ապրիլի 17-ին, ժամը 16.56-ին ահազանգ է ստացվել, որ Սպիտակ-Երեւան ավտոճանապարհի 10-րդ կմ-ին վթար է եղել։ Պարզվել է, որ միջպետական Մ-3 ավտոճանապարհի Սպիտակ-Երեւան հատվածի 24-րդ կմ-ին դեռեւս չբացահայտված հանգամանքներում բեռնատար ավտոմեքենան դուրս է եկել ճանապարհի երթեւեկելի հատվածից եւ շրջվել հարակից ձորակը (մոտ 10 մ):

Ուղեւորներ Մ. Ք.-ը, Ն. Ա.-ը, Հ. Գ.-ը, Ա. Ս.-ը, Ա. Օ.-ը, Մ. Շ.-ը եւ Մ.-ը հոսպիտալացվել են Սպիտակ քաղաքի ԲԿ:

Ժամը 18.36-ին հրշեջ-փրկարարները բեռնատարից դուրս են բերել ուղեւորներից մեկի դին:

Ինչպես ավելի վաղ NEWS.am-ին հայտնել էր ՊՆ մամուլի խոսնակ Արծրուն Հովհաննիսյանը, վիրավորներից 3-ի վիճակը ծանր է։

Մեր տեղեկություններով, վիրավորներից երեքին այս պահին տեղափոխում են Երեւան՝ զինվորական հոսպիտալ։