Հայոց ցեղասպանության վերաբերյալ Եվրախորհրդարանի ընդունած բանաձեւը կարող է Թուրքիային օգնել ընդունել սեփական սխալներն ու անցյալի հանցագործությունները: Այս մասին NEWS.am-ի թղթակցի հետ զրույցում հայտարարեց Եվրախորհրդարանի բելգիացի պատգամավոր, Կանաչների եւ Եվրոպական ազատ դաշինքի խմբի անդամ Բարտ Ստաեսը:
Նա նշեց, որ ուրախ է բանաձեւի ընդունման կապակցությամբ: «Ես Եվրախորհրդարանի առաջին բանաձեւի կողմնակիցներից եմ եղել, որի հիմնական զեկուցողը պատգամավոր Ժակ Վանդեմյուլեբրուքն էր: Շատ կարեւոր է, որպեսզի 20-րդ դարի առաջին ցեղասպանությունը ճանաչվի: Հույս ունեմ, որ Եվրախորհրդարանի այս բանաձեւը կբացի թուրքական ղեկավարության աչքերը»,- ընդգծեց Բարտ Ստաեսը:
Հիշեցնենք, որ ապրիլի 15-ին Բրյուսելում Եվրախորհրդարանը Հայոց ցեղասպանության մասին բանաձեւ ընդունեց, որում Թուրքիային կոչ է արվում 1915 թվականի դաժանությունները որպես ցեղասպանություն ճանաչել, առերեսվել սեփական անցյալի հետ եւ շարունակել ջանքեր գործադրել հայ եւ թուրք ժողովուրդների իրական հաշտեցման ուղղությամբ:
