Ռուսաստանում Հայաստանի դեսպան Օլեգ Եսայանի հանձնարարությամբ հուլիսի 29-ին Նովոռոսիյսկ կժամանեն Հարավային Դաշնային շրջանում Հայաստանի Գլխավոր հյուպատոս Արարատ Գոմցյանը եւ այդ շրջանի համայնքի ներկայացուցիչ Ա. Գեւորգյանը։
Ինչպես NEWS.am-ին տեղեկացրել են Ռուսաստանում Հայաստանի դեսպանատնից, նրանք կհանդիպեն քաղաքային կառույցների ղեկավարների հետ, որպեսզի ներկայացնեն հայկական կողմի վերաբերմունքը կատարված վանդալիզմի վերաբերյալ։
Ռուսաստանում Հայաստանի դեսպանատան կողմից ավելի վաղ ձեռնարկված քայլերի արդյունքում այսօր Նովոռոսիյսկի իշխանությունների կողմից հայտարարություն է տարածվել, որում ասվում է, որ Նովոռոսիյսկում ավերված բոլոր հայկական գերեզմանաքարերը քաղաքային բյուջեի հաշվին կվերականգնվեն։
Ինչպես ավելի վաղ հայտնել էր NEWS.am-ը, ավերածությունները կատարվել էին քաղաքային երեք գերեզմանոցներում։ Վանդալիզմը տեղի էր ունեցել հուլիսի 24-ի առավոտյան։ Անհայտ անձիք ջարդել էին խաչերը եւ շիրմաքարերը, սակայն հակաազգային կամ կրոնական բնույթի գրություններ չէի հայտնաբերվել։