Հարավային Կովկասում ԵՄ հատուկ ներկայացուցիչ Հերբերթ Զալբերը ափսոսում է, որ ԼՂ հակամարտությունները կողմերի ու միջնորդների բազմամյա ջանքերը չեն հանգեցրել առաջընթացի հակամարտության լուծման գործում: Այս մասին Հերբերթ Զարբերը հայտարարել է Բաքվում մի խումբ հասարակական կազմակերպությունների ներկայացուցիչների հետ հանդպման ժամանակ:
Ինչպես հաղորդում է contact.az-ը, Զարբերը ահազանգ է հնչեցրել, որ շփման գծում լարվածությունը չի դադարում եւ «գրեթե ամեն օր մարդիկ են մահանում»: Նրա խոսքով առանց փոխզիջումների խնդիրը դժվար թե լուծում ստանա եւ անհրաժեշտ է շարունակել աշխատանքը Հայաստանում, Ադրբեջանում եւ Ղարաբաղում քաղաքացիական հասարակության հետ՝ հաշտության ելքեր որոնելու համար:
«Ի վերջո, հակամարտության լուծումը կախված է շարքային քաղաքացիներից: Դեռեւս մենք չենք կարող խոսել կարգավորման մասին»,-ասել է Զալբերը:
Ինչ վերաբերում է ԵՄ դիրքորոշմանը, ապա Բրյուսելը պաշտպանում է ԵԱՀԿ Միսնկի խմբի ջանքերը եւ չի կարող գլխավոր դեր ստանձնել այդ գործընթացում: Մինսկի խմբի կառուցվածքը փոխել կամ նոր միջնորդներ ներգրավելը դժվար թե հնարավոր է: «Մինսկի խմբի համանախագահները ավելի քան 20 տարի զբաղված են դրանով, նրանք փորձ են կուտակել եւ տարբեր առաջարակություններ մշակել այս ընթացքում: Դրանից հրաժարվելը եւ ամեն ինչ զրոյից սկսելը դժվար թե հնարավոր է եւ արդյունավետ»,-ընդգծել է Զալբերը:
Ինչ վերաբերում է ԵՄ դերին, Բրյուսելը պատրաստ է աջակցել նախագծերին ու միջոցառումներին, որոնք ուղղված են վստահության ամրապնդմանը եւ կողմերի միջեւ շփումներին: Առաջընթացի դեպքում՝ ԵՄ-ն միջոցներ կհատկացնի պատերազմի հետեւանքների վերացման համար, ասել է նա:
«Պետք է պատրաստ լինել փոխզիջումների, բայց մենք դեռեւս դա չենք տեսնում: Մենք չենք կարող լուծել հակամարտությունը կողմերի փոխարեն»,-ասել է Զալբերը:
Նա նաեւ սխալ է համարում Լեռնային Ղարաբաղի հակամարտության համեմատումը այլ հակամարտությունների հետ, եւ դեմ է երբ համեմատում են Եվրոպայի դերը Ուկրաինայում եւ Ղարաբաղում ստեղծված իրավիճակներին: Նրա խոսքով՝ հակամարտություններից յուրաքանչյուրն ունի իր պատմությունն ու արմատները: «Դրանք համեմատելն ապակառուցողական է: Բացի այդ, յուրաքանչյուր դեպքում առկա են այս կամ այն գերտերությունների աշխարհաքաղաքական շահեր»,-նշել է նա: