ԼՂՀ խորհրդարանական ընտրություններին որպես դիտորդ մասնակցելու համար Ստեփանակերտ ժամանած զիմբաբվեցի լրագրող Էնդրիու Մամբոնդիանին տպավորված է Լեռանային Ղարաբաղով: Մինչեւ Արցախ ժամանելը Ղարաբաղի մասին ոչինչ չլսած լրագրողը կատակով նշում է, որ Զիմբաբվեում կլինի Լեռնային Ղարաբաղի ոչ պաշտոնական դեսպանը:
«Ֆանտաստիկ երկիր է, ես հաճույք եմ ստանում ցանկացած օրից, որ այստեղ եմ անցկացնում: Երբ վերադառնամ Զիմբաբվե, բոլորին կպատմեմ Ղարաբաղի մասին, կասեմ, որ գան այստեղ: Ես հասցրել եմ այցելել Շուշի, Գանձասար: Շատ հիանալի եկեղեցիներ, վայրեր կան այստեղ»,- լրագրողների հետ զրույցում ասաց Էնդրիու Մամբոնդիանին:
Զիմբաբվեցի լրագրողը Լեռնային Ղարաբաղում անցկացվող ընտրություններն ավելի արդար եւ ժողովրդավարական է համարում, քան իր երկրում անցկացվող ընտրությունները: Նրա խոսքով, էական նշանակություն չունի, որ ԼՂՀ այս ընտրությունները միջազգային հանրությունը չի ճանաչում:
«Ղարաբաղի ժողովուրդն ինքը պետք է որոշի, թե ինչ է ուզում: Կարեւորն այն է, որ ընտրություններն արդար լինեն, անցկացվեն բաց եւ թափանցիկ: Անգամ Զիմբաբվեում ընտրությունները ԱՄՆ-ն չի ճանաչում»,- ասաց նա: