Ղարաբաղում խորհրդարանական ընտրությունները անցել են թափանցիկ, ինչը եւս մեկ անգամ ապացուցում է ժողովրդավարական արժեքներին հավատարիմ մնալու Ղարաբաղի ժողովրդի ցանկությունը։ Այս մասին մայիսի 4-ին Ստեփանակերտում հայտարարել է ԱՄՆ, Մեքսիկայի եւ Բրազիլիայի դիտորդական առաքելության ներկայացուցիչ Քերին Մակդոնալդսը։
Նրա խոսքով՝ այդ մասին է վկայում ընտրություններին քաղաքացիների մասնակցության բարձր ցուցանիշը։ «Մեզ ընտրություններին հետեւելու անսահմանափակ հնարավորություններ էին տրամադրվել, որոնց ընթացքում մենք խախտումներ չենք արձանագրել»։
Իր հերթին Գեյլ Փեփերինը նշել է, որ ԼՂՀ խորհրդարանական ընտրությունները կարելի է համեմատել ցանկացած եվրոպական երկրում անցկացվող ցանկացած ընտրության հետ։ Ռոդրիգո Գարիսա Գոմեսի գնահատմամբ՝ ինչպես ընտրությունների ընթացքում, այնպես էլ դրանից առաջ ապահովվել են ազատ, ժողովրդավարական եւ թափանցիկ ընթացակարգեր։ «Ամեն ինչ կազմակերպված էր հստակ եւ թափանցիկ՝ միջազգային նորմերին համապատասխան»։ Ամերիկացի Անդրեաս Բորգեսը իր հերթին նշեց, որ վատ չէր լինի, եթե ԱՄՆ-ում ընտրությունները կազմակերպվեն ղարաբաղյան ընտրությունների օրինակով, որտեղ քաղաքացիների մասնակցությունը կազմում է 70 տոկոս։ «ԱՄՆ-ի համար դա աննախադեպ է»։
Միաժամանակ դիտորդները նշել են, որ որոշ ընտրատեղամասերում ֆիզիկական սահմանափակումներ ունեցող մարդկանց համար որոշակի անհարմարություններ են եղել։