Խորհրդարանական ընտրություններում մեր կուսակցության ձայները տքնաջան պայքարի արդյունք է, եւ այսուհանդերձ մենք մեծ ակնկալիքներ ունեինք։ Այս մասին մայիսի 4-ին Ստեփանակերտում լրագրողներին հայտարարել է ընդդիմադիր «Ազգային վերածնունդ» կուսակցության առաջնորդ Հայկ Խանումյանը։
«Անկեղծ ասած՝ մենք փորձում ենք շնորհավորանքներ չընդունել, քանի որ սա այն արդյունքը չէ, որը մենք սպասում էին։ Սակայն պատկերը կանխատեսելի էր։ Մենք դեռեւս նախընտրական պայքարի ընթացքում հայտարարում էինք, որ ռեսուրսների կենտրոնացումը կհանգեցնի իշխանությունների վերարտադրությանը, իսկ տնտեսական ռեսուրսները մեկ ուժի ձեռքում կենտրոնացնելը բերում է հանրության լճացմանը»,- նշեց Խանումյանը։
Նա նաեւ ընդգծեց, որ դրա հետեւանքով ընդդիմադիր կուսակցությունները ցածր տոկոսներ են հավաքել։ Քաղաքական գործիչը չի բացառել ԼՂՀ խորհրդարանում ընդդիմադիր կուսակցությունների համագործակցությունը։ «Եթե «Շարժում 88»-ը իրեն դրսեւորի որպես ընդդիմություն, ապա մեր խորհրդարանական համագործակցությունը բացառված չէ»։