Մանկական «Դոն» կոչվող ճամբարում, որտեղ զանգվածային բախում է տեղի է ունեցել, հանգստանում էին Չեչնիայից եկած 17-20 տարեկան ավելի քան 400 անչափահասներ եւ մոտ 100 փոքր տարիքի երեխաներ ՝Ռուսաստանի այլ տարածաշրջաններից: Բախումը սկսել են չեչենները: Այս մասին NEWS.am-ի թղթակցի հետ զրույցում ասել է Ռուսաստանի հայերի միության Կրասնոդարի բաժնի ղեկավար Գուրգեն Իվանյանը: Նա նշել է, որ շրջանում, ուր գտնվում է ճամբարը, մեծ թվով հայեր են բնակվում, որոնց մի մասն աշխատում է իրենց հետ: Չեչենները սկսել են ծաղրել աղջիկներին, իսկ հայերը որոշել են պաշտպանել նրանց: «Չեչենները ոչ միայն ավերել են ճամբարը, այլ նաեւ ծեծել են ճամբարի տնօրենին ու փոխտնօրենին՝ կոտրելով վերջինիս ոտքը»,-նշել է նա:
Իվանյանը հերքել է ռուսական լրատվամիջոցների այն տեղեկությունը, թե հայերը իբր ճամբարում ամեն ինչ ջարդուփշուր են արել: Նա նշել է, որ Անվտանգության դաշնային ծառայությունը, որը քննություն է իրականացնում, հայերին ոչ մի մեղադրանք չի առաջադրել:
Ինչպես ավելի վաղ հայտնել էր NEWS.am-ը, Կուբանում գտնվող առողջարանային «Դոն» համալիրում տեղի էր ունեցել կոնֆլիկտ՝ ճամբարի տնօրենի տեղակալի եւ Չեչնիայի հանրապետության երեք անչափահաս քաղաքացիների միջեւ: Ըստ Կրասնոդարի երկրամասի ՆԳ գլխավոր վարչության՝ տեղի է ունեցել բախում՝ կենցաղային հողի վրա։ Ճամբարի տնօրենի տեղակալին դուր չի եկել այն, թե ինչպես են անչափահասները փորձում ծանոթանալ աղջկա հետ: Նա խնդրել է նրանց հեռանալ ճամբարի ննջարանային մասնաշենքից, դիտողություն արել, ինչից հետո էլ չեչեն անչափահասները ծեծել են տնօրենի տեղակալին:
