Գերմանիայի Հալե քաղաքում Հայոց ցեղասպանության 100-ամյակի կապակցությամբ խաչքար է տեղադրվել։ Հալեի քաղաքային խորհուրդը դեռեւս 2012թ. որոշել էր խաչքարը տեղադրել հենց այս տարի՝ հարգանքի տուրք մատուցելով Ցեղասպանության 100-ամյակին, գրում է hallespektrum.de-ն։
Գերմանիայում հայ առաքելական եկեղեցու թեմի արքեպիսկոպոս Գարեգին Բեքջյանը եւ Սաքսոնիա Անհալթ դաշնային հողի քրիստոնյա եկեղեցիների խորհրդի ղեկավար Յուրգեն Դիթրիխը Ցեղասպանության զոհերի հիշատակին նվիրված էկումենիկ աղոթք են կարդացել։ Միջոցառման պատվավոր հյուրն է եղել ԵՊՀ աստվածաբանության ֆակուլտետի դեկան Անուշավան եպիսկոպոս Ժամկոչյանը։
Բացման խոսքով հանդես է եկել քաղաքապետ Բերնդ Վիգանդը. «20-րդ դարը նշանավորվեց զանգվածային սպանություններով, էթնիկ զտումներով եւ ցեղասպանություններով, որոնք կյանքի կոչվեցին ամենաանմարդկային եւ բարբարոս ձեւերով։ Մարդկության դեմ գործած այդ հանցագործության մասին հիշողությունը դրդում է մեզ մարդասիրության, խաղաղության եւ հաշտեցման կոչ անել։ Դա այսօր առավել քան արդիական է, քանի որ աշխարհում շարունակվում են կրոնական, քաղաքական եւ ազգայնական հակամարտությունները։ Այս խաչքարը խաղաղության, հաշտեցման եւ մարդասիրության կոչ է»։
Սաքսոնիա Անհալթ դաշնային հողի մշակույթի նախարար Շտեֆան Դորգերլոհը նշել է, որ Ցեղասպանությունից 100 տարի անց դրա հետեւանքները չեն վերացել։ «Այս խաչքարը պետք է միշտ հիշեցնի անմեղ զոհերի մասին։ Մենք պետք է ասենք, ինչ է եղել իրականում եւ որն է ճշմարտությունը։ Սա Հայաստանի եւ Սաքսոնիա Անհալթի միջեւ բարեկամության խորհրդանիշ է։ Մենք շահագրգռված ենք երկու ժողովուրդների եւ մշակույթների համագործակցության ու փոխըմբռնման գործում»,- հայտարարել է նա։
