Բոլոնիայի գործընթացը համամարդկային արժեքներով առաջնորդվող նոր սերունդ ձևավորելու համար բացառիկ հնարավորություն է: Այս մասին այսօր՝ մայիսի 14-ին, Երեւանում ընթացող՝ Եվրոպական բարձրագույն կրթական տարածքի նախարարական գագաթաժողովի ու Բոլոնիայի գործընթացի չորրորդ ֆորումի բացմանն ասաց Հայաստանի Հանրապետության կրթության և գիտության նախարար Արմեն Աշոտյանը (ֆոտոռեպորտաժ):
«Երևանում քննարկվելիք և ընդունվելիք փաստաթղթերն ու որոշումները կարևորագույն ազդեցություն կունենան եվրոպական կրթական համակարգի զարգացման վրա: Բոլոնիայի գործընթացն իր ողջ դժվարություններով ու մարտահրավերներով հանդերձ՝ հաջողված գործընթաց է: Այն բացառիկ նախագիծ է, որը միավորում է 47 եվրոպական երկիր: Այս նախագծի էությունը միայն կրթական չէ. դրա կարևորությունը նաև քաղաքակրթական է, այսինքն՝ բացառիկ հնարավորություն համամարդկային միասնական արժեքներով առաջնորդվող նոր սերունդ ձևավորելու համար»,- ասաց նախարարը:
Արմեն Աշոտյանի խոսքով՝ ֆորումը հնարավորություն է կրթական ոլորտում եղած խնդիրներին լուծում գտնելու համար:
«Եվրոպական քաղաքակրթության առջև այսօր ծառացած բազմաթիվ մարտահրավերների լուծումները կարելի է գտնել հենց ժողովրդավարական, քաղաքացիական դաստիարակության, համամարդկային արժեքների տարածքում գտնվող անհատների մեջ: Կրթական ոլորտի բարեփոխումները պահանջում են նաև քաղաքական կամք, որի արտահայտման համար հարկավոր են լիդերներ»,- ասաց նախարարը:
Արմեն Աշոտյանը նշեց նաեւ, որ կարեւոր է նաեւ իրականացված բարեփոխումների հանրային ընկալումը: Նրա խոսքով՝ անկախ առկա ձեռքբերումներից, հանրային կարծիքը երբեմն քննադատաբար է վերաբերվում տարբեր երկրներում իրականացվող կրթական բարեփոխումներին, ինչը նշանակում է, որ պետք է փորձելով հասարակությանը լավագույն կերպով ներկայացնել իրականացվող փոփոխությունների իմաստը։
«Բոլորս պետք է պահպանենք այն, ինչ կարողացել ենք ստեղծել: Այն նախաձեռնությունը, որ ցուցաբերվեց 1999 թվականին Եվրոպական հռչակագրի կնքման պահից, պետք է պահել և տարածել ինչպես աշխարհագրորեն` հարակից երկրների վրա, այնպես էլ մեր երկրների ներսում»,- ասաց Արմեն Աշոտյանը: