Կանադայի սենատը հաստատել է Հայոց ցեղասպանության ճանաչման փաստը՝ եւս մեկ անգամ պաշտպանելով համար 44 որոշումը, որը առաջին անգամ հաստատվել էր 2002թ.։ Այս մասին գրում է հայ-կանադական Horizon Weekly պարբերականը։
«Պաշտոնապես ճանաչելով Հայոց ցեղասպանությունը՝ Կանադան գործում է աշխարհում իր քարոզած սկզբունքներին համաձայն։ Ցանկացած երկիր, որը ցանկանում է ճնշել իր անցյալը, ցանկացած երկիր, որը չի առերեսվում իր անցյալին, լրջորեն ռիսկի տակ է դնում սեփական պատմության բեռից ձերբազատվելու հարցը»,- հայտարարել է սենատոր Թհան Հայ Նգոն։
Նա հավելել է, որ այդ ծանր հանցագործությունն անպատիժ է մնում, քանի դեռ Թուրքիան հրաժարվում է ճանաչել դա։ «Կանադայի Սենատը անտարբեր չէ Հայոց ցեղասպանության ժամանակ իրականացված գազանությունների հանդեպ։ Մենք պետք է նպաստենք արդարությանը, մարդու իրավունքներին, հանդուրժողականությանը, ազգերի խաղաղ գոյատեւմանը, քանի որ դա ճիշտ է։ Ինձ համար մեծ պատիվ է Հայոց ցեղասպանության 100-ամյակի կապակցությամբ ելույթ ունենալ այս պալատի առջեւ եւ հաստատել 2002թ. համար 4 որոշմանը հավատարիմ մնալու մեր ցանկությունը»,- նշեց սենատորը։
Սենատի խոսնակ Լեո Հուսակոսը նշել է Հայոց ցեղասպանության 100-ամյակի կարեւորությունը՝ ողջունելով Հայաստանի դեսպան Արմեն Եգանյանին եւ նստաշրջանի բացմանը ներկա հայ համայնքի ներկայացուցիչներին։ Մյուս սենատորները միացել են իրենց գործընկերներին՝ հաստատելով մարդու իրավունքներին, միջազգային արդարադատությանը եւ խաղաղությանը հավատարիմ մնալու իրենց որոշումը։