Էլեկտրաէներգիայի թանկացման դեմ պայքարող «Ոչ թալանին» շարժման հայտարարած նստացույցը Ազատության հրապարակում շարունակվում է։
NEWS.am–ի թղթակիցը հաղորդում է, որ քիչ առաջ հանրային քննարկում տեղի ունեցավ` նստացույցի կազմակերպչական հարցերը քննարկելու նպատակով։ Կազմակերպիչները որոշեցին, որ խումբ–խումբ կնստեն`ոստիկանության հնարավոր սադրանքներից խուսափելու նպատակով։
Բացի դրանից որոշվեց հանգանակություն կազմակերպել հրապարակում գիշերողներին սննդով ապահովելու համար։
Կազմակերպիչներին հավաքվածներին զգուշավորության կոչ արեցին` հիշեցնելով Երեւանի փոխոստիկանապետ Վալերի Օսիպյանի նախազգուշացումը, որ հավաքը արտոնված է մինչեւ ժամը 23։00–ն, եւ դրանից հետո ցանակցած գործողություն դիտվելու է որպես ապօրինի, ու հնարավոր է` ոստիկանները փորձեն ուժ գործադրել իրենց հեռացնելու համար։
«Ժամը 11–ից հետո հյուրեր ենք ունենալու։ Տեսնենք` ինչով կգան` ջրցան մեքենաներով, թե դուբինկաներով»,– հայտարարեց «Հիմնադիր խորհրդարանի» անդամ Վարդան Հակոբյանը։
Ոստիկաններն այժմ խումբ–խումբ նստած քաղաքացիների մոտ կանգած հսկողություն են իրականացնում։
Քաղաքացիներից շատերն արդեն պատրաստակամություն են հայտնել գիշերը Ազատության հրապարակում անցկացնելու, իսկ նրանք, ովքեր չեն գիշերելու այդտեղ. Հայտարարել են, որ վերադառնալու են առավոտյան։
Ավելի վաղ NEWS.am-ը հաղորդել էր, որ էլեկտրաէներգիայի թանկացման դեմ հավաքի ընթացքում «Ոչ թալանին» նախաձեռնությունը անսպասելիորեն հայտարարել է, որ եռօրյա նստացույց են սկսում Ազատության հրապարակում՝ իշխանություններին մինչև երկուշաբթի երեկոյան ժամը 19:00-ն տալով վերջնաժամկետ. եթե մինչև այդ հոսանքի թանկացման որոշումը չեղյալ չհայտարարվի, նրանք կշարժվեն դեպի Բաղրամյան 26:
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով:
Լուսանկարները՝ Արսեն Սարգսյանի /NEWS.am