Բաղրամյան փողոցում հոսանքի թանկացման որոշումը չեղյալ հայտարարելու պահանջով նստացույց անող ցուցարարներին քիչ առաջ միացավ Բագրատ եպիսկոպոս Գալստանյանը: (ֆոտոռեպորտաժ)
Գալստանյանը հրաժարվեց պատասխանել լրագրողների հարցերին՝ նշելով, որ իր գալու նպատակը հարցազրույց տալը չէ:
« Փոխոստիկանապետի հետ եմ խոսել, սակայն մեր զրույցը հրապարակել չեմ կարող: Ինձ մտահոգում է, որ մարդկանց քանակն է քիչ, բացի դրանից՝ չեմ ցանկանում, որ բախումներ լինեն»,- ասաց եպիսկոպոսը՝ հավելելով, որ չգիտի ում մոտենալ եւ ինչ ասել:
NEWS.am-ի թղթակիցը հաղորդում է, որ քաղաքացիները դեռ նստած են Բաղրամյան պողոտայի սկզբնամասում:
Նշենք, որ Բաղրամյան պողոտայում հազարավոր ցուցարարների դիմաց մի քանի շարքով պատ են կազմել ոստիկանները, Բաղրամյան և Դեմիրճյան փողոցների վրա նաև ոստիկանական մեքենաներ կան, այդ թվում՝ ջրցան եւ զրահամեքենաներ, փշալարեր։ Զրահաբաճկոններով, վահաններով ու ռետինե մահակներով զինված ոստիկանները մի քանի շարքով պատ են կազմել։ Ոստիկանների հետ կանգնած են նաեւ մեծ թվով քաղաքացիական հագուստով ոստիկաններ կան, որոնք կանգնել են ոստիկանական շղթայի առջե։ Չնայած նախազգուշացումներին` մի քանի հարյուր ցուցարար շարունակում է նստած մնալ գետնին, մի մասն էլ ուղղակի պառկել է Բաղրամյան պողոտայում, նրանք հայրենասիրական երգեր են երգում։
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով:
