Բաղրամյան պողոտայում այս պահին շարունակվում է բողոքի լայնածավալ ակցիան՝ ընդդեմ էլեկտրաէներգիայի սակագնի թանկացման։ Ինչպես հայտնում է NEWS.am-ի թղթակիցը, ակցիայի մասնակիցները երաժշտություն են լսում, զրուցում։ Ակցիայի մասնակիցների թիվը գնալով ավելանում է։
Պաղրամյան պողոտա է եկել ոստիկանապետ Վլադիմիր Գասպարյանը, որը խորհրդակցություն է անում պողոտայում գտնվող ոստիկանության բարձրաստիճան աշխատակիցների հետ։ Նշենք, որ ոստիկանապետն այսօր ցերեկն էլ էր եկել։
Ավելի վաղ փոխոստիկանապետ Հունան Պողոսյանը լրագրողների հետ զրույցում նշել էր, թե քանի ցույցը խաղաղ է, ուժ չի կիրառվելու։
Նշենք, որ հունիսի 23-ի երեկոյան, ժամը 19:00-ից քաղաքացիները հավաքվել են Բաղրամյան պողոտայում, փակել այն եւ պահանջում են կասեցնել հունիսի 17-ին կայացրած որոշումը:
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով:
