«Մեր պայքարը չի ավարտվելու, մինչեւ մենք չստանանք մեր պահանջի պատասխանը»,- ամբիոնից ասել են նախաձեռնողց խմբի անդամները։ Ի պատասխան հավաքվածները հավանության վանկարկումներ են արել։

Բաղրամյան պողոտայում պաստառներ են հայտնվել՝ «Մեր պահանջը չի կատարվել» գրառումներով։

Նշենք, որ Բաղրամյան պողոտայում ընդդեմ էլեկտրաէներգիայի թանկացման նստացույցի մասնակիցները չեն ընդունել նախագահ Սերժ Սարգսյանի առաջարկը։  «Ոչ թալանին» նախաձեռնության անդամ Վաղինակ Շուշանյանը ամբիոնից ավելի վաղ հայտարարել էր, որ սա իրենք հաղթանակ չեն համարում, շարունակում են պայքարը, փակ են պահելու պողոտան, քանի որ իշխանությունները չեն ընդունել ցուցարարների եւ ոչ մի պահանջը։

Ըստ Շուշանյանի, Սերժ Սարգսյանը չի չեղարկել ՀԾԿՀ որոշումները՝ էլեկտրաէներգիայի թանկացման վերաբերյալ, եւ չեն խոստացել պատժել հունիսի 23-ին ապօրինություններ թույլ տված ոստիկաններին։

Հիշեցնենք, որ էլեկտրաէներգիայի թանկացման որոշումը չեղյալ հայտարարելու պահանջով Բաղրամյան փողոցում սկսված նստացույցի 6–րդ օրը` հունիսի 27–ին, նախագահ Սերժ Սարգսյանն խորհրդակցություն է անցկացրել հանրապետության տնտեսական քաղաքականության պատասխանատուների հետ, որի ընթացքում հայտարարել է, որ մինչեւ ՀԷՑ–ի կողմից էլեկտրաէներգիայի թանկացման հայտի հիմնավորվածությունը ստուգող` միջազգային աուդիտի եզրակացության կազմումը կառավարությունն իր վրա կվերցնի սակագնի բարձրացման ամբողջ բեռը` վճարելով 6,9 դրամը։