Երեւանի փոխոստիկանապետ Վալերի Օսիպյանը կարծում է, որ Բաղրամյան պողոտայում հավաքված քաղաքացիներն իրավագիտակից են եւ ի վերջո իրենց կամքով կազատեն պողոտան: NEWS.am-ի թղթակցի խնդրանքով մեկնաբանելով հուլիսի 1-ին ՀՀ ոստիկանության տարածած հայտարարությունը՝ ասաց Վալերի Օսիպյանը՝ հավելելով, որ Բաղրամյան պողոտայում իրավիճակը երկար չի կարող այսպես մնալ եւ ոստիկանությունն ի վերջո ստիպված կլինի այնտեղ վերականգնել հասարակական կարգը:
«Բաղրամյան պողոտայում վերականգնելու ենք հասարակական կարգը: Այժմ քաղաքացիների հետ բացատրական աշխատանքներ ենք տանում, որպեսզի կողմնորոշվեն, օրենք չխախտեն եւ ազատեն պողոտան: Կարծում եմ, որ մեր քաղաքացիները իրավագիտակից են եւ հասկանում են, որ անթույլատրելի է օրենք խախտելը: Ոստիկանությունն այժմ փորձում է ամեն ինչ անել, որպեսզի իրենց կամքով ազատեն պողոտան»,- ասաց Վալերի Օսիպյանը:
Հիշեցնենք, որ ՀՀ ոստիկանությունը հուլիսի 1-ին հայտարարություն էր տարածել՝ հավաքի կազմակերպիչներին եւ մասնակիցներին կոչ անելով դրսեւորել ողջախոհություն, հարգել ՀՀ Սահմանադրությունն ու օրենքները, այլոց իրավունքներն ու օրինական շահերը եւ ինքնակամ վերացնել Բաղրամյան պողոտայի շուրջ տասն օր տեւող արգելափակումը:
Նստացույցը համակարգողներից Դավիթ Սանասարյանը, սակայն, չի կարեւորում Բաղրամյան պողոտայում հասարակական կարգը վերականգնելու մասին ոստիկանության հայտարարությունը:
«Ոստիկանությունը հայտարարություններ տարածելու իրավունք ունի եւ թող շարունակի այդ անել: Մենք այստեղ զինված ենք իրավունքով, պարզապես ոստիկաններին կոչ եմ անում, որպեսզի իրենց գործով զբաղվեն՝ այստեղ անվտանգություն ապահովեն ու սադրիչներին հեռացնեն: Կարեւորը մենք հասել ենք նրան, որ ոստիկանությունն այստեղ այլեւս քաղաքական ելույթներ չի ունենում եւ մեր մեջ «գժուկներ» չի փնտրում»,- ասաց նա: