Բաղրամյան պողոտայում, այսօր՝ հուլիսի 2-ին Երեւանի փոխոստիկանապետ Վալերի Օսիպյանը հորդորում էր հարակից շենքի բնակիչներից մեկին հարեւաններով հավաքվել ու բողոք գրել ցուցարարների գործողությունների դեմ:
Նա դիմելով բնակիչներից մեկին, ասաց. «Երեկ այստեղ անօրինական հավաքի մասնակիցներից մեկը հայտարարել է, որ բոլոր բնակիչները ողջունում են մեր գործողությունները, ոստիկանությունը ստում է, թե կան բողոքներ, ոստիկանությունն փորձում է ազդել հարակից շենքերի բնակիչների վրա: Ձեզ վրա որեւէ մեկն ազդե՞լ է: Հիմա ես ձեզ հորդորում են հարեւաններով հավաքվեք դիմեք, ոստիկանությունը համապատասխան պարզաբանումները կստանա եւ կփորձենք վերականգնել ձեր սահմանադրական իրավունքները: Դուք պատրա՞ստ եք»:
Ի պատասխան բնակիչը, որը չէր ցանկանում իրեն նկարել, պատասխանել է. «Տեսնենք»:
Օսիպյանն ի պատասխան նշել է. «Դե, տեսնում եք, համ մի բան եք ասում, հետո մեկ այլ բան: Մենք պատրաստակամ ենք ձեզ աջակցելու: Մենք ձեր դրության մեջ մտնում ենք որպես բնակիչ: Դուք եկել եւ կարծիք եք հայտնում, որ բնակիչները դժգոհ են անօրինական հավաքի գործողություններից: Մենք ամեն ինչ կանենք, որ ձեր իրավունքները վերականգնվեն»:
«Շատ բարի, շնորհակալություն»,-արձագանքել է բնակիչը:
Այս պահին հրապարակում են նաեւ «Ոչ թալանին» նախաձեռնության մի քանի անդամներ, որոնք արդեն հանդես են գալիս որպես ակցիայի սովորական մասնակիցներ:
Հիշեցնենք, որ հունիսի 22-ից Բաղրամյան պողոտայում բողոքի ակցիա է ընթանում ընդդեմ էլեկտրաէներգիայի սակագնի բարձրացման։ Հունիսի 23-ի առավոտյան ոստիկանությունը ուժով ցրել էր նստացույցը, բերման ենթարկել 237 մարդու, բայց երեկոյան բողոքի ակցիան վերսկսվել էր։ Հունիսի 27-ին Սերժ Սարգսյանի ելույթից հետո նախաձեռնող խմբի կազմում տարաձայնություններ էին առաջացել, եւ հաջորդ օրը ցուցարարների մի մասը հեռացել էր Ազատության հրապարակ, իսկ մեծ մասը մնացել էր Բաղրամյան պողոտայում, որտեղ մինչ այժմ շարունակվում է բողոքի ակցիան։
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով: