Աուդիտը ժամանակ շահելու միջոց է: Այս մասին այսօր՝ հուլիսի 2-ին, լրագրողներին ասաց ԵՊՏՀ դոցենտ, տնտեսագետ Աշոտ Եղիազարյանը՝ անդրադառնալով ՀԷՑ-ում անկախ աուդիտ անցկացնելու և արտաբյուջետային միջոցներով Էլեկտրաէներգիայի 6.93 դրամը փոխհատուցելու մասին:
«Աուդիտով պետք է հիմնավորվի հոսանքի սակագնի 7 դրամի թանկացումը, սակայն աբսուրդային է նաեւ արտաբյուջետային միջոցներով հոսանքի թանկացման ֆինանսավորումը»,-ասաց տնտեսագետը՝ նշելով, որ Հայաստանը զրկվում է էժան էլեկտրաէներգիա ձեռք բերելու հնարավորությունից, քանի որ ատոմակայանը մյուս տարի կանգնելու է, իսկ Ռուսաստանը Հայաստանին չի աջակցելու նոր ատոմակայան կառուցելու համար:
Աշոտ Եղիազարյանը նշեց, որ Ռուսաստանի էներգետիկ համակարգը գտնվում է ճգնաժամային վիճակում եւ դրա պատճառը պատժամիջոցներն ու տնտեսական մյուս խնդիրներն են:
«Դրա արդյունքում Ռուսաստանից կախված երկրների տնտեսությունները դառնում են ոչ մրցունակ: Ռուսական կողմն այնպիսի դիրքորոշման է, որ մենք մեր խնդիրները պետք է լուծենք մեր ներքին ռեսուրսների հաշվին»,-ասաց նա:
Հիշեցնենք, որ հունիսի 22-ից Բաղրամյան պողոտայում բողոքի ակցիա է ընթանում ընդդեմ էլեկտրաէներգիայի սակագնի բարձրացման։ Հունիսի 23-ի առավոտյան ոստիկանությունը ուժով ցրել էր նստացույցը, բերման ենթարկել 237 մարդու, բայց երեկոյան բողոքի ակցիան վերսկսվել էր։ Հունիսի 27-ին Սերժ Սարգսյանի ելույթից հետո նախաձեռնող խմբի կազմում տարաձայնություններ էին առաջացել, եւ հաջորդ օրը ցուցարարների մի մասը հեռացել էր Ազատության հրապարակ, իսկ մեծ մասը մնացել էր Բաղրամյան պողոտայում, որտեղ մինչ այժմ շարունակվում է բողոքի ակցիան։
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով: