Թբիլիսիի Մուղնեցոց Սուրբ Գեւորգ եկեղեցում, որը փլուզվել էր 2009 թվականի նոյեմբերին, Հայաստանի եւ Վրաստանի կառավարությունների օժանդակությամբ վերականգնման աշխատանքներ են ընթանում: 1356 թվականին կառուցված հուշակոթողը վերականգնելու աշխատանքները քննարկելու նպատակով օգոստոսի 5-ից աշխատանքային այցով Թբիլիսի էր մեկնել ՀՀ մշակույթի փոխնախարար Արեւ Սամուելյանի գլխավորած պատվիրակությունը: Պատվիրակության ղեկավարը նոր է վերադարձել Հայաստան, սակայն հայաստանցի փորձագետները դեռեւս շարունակում են աշխատանքները եկեղեցու վերականգնման աշխատանքների ուղղությամբ: Այս մասին NEWS.am-ի թղթակցի հետ զրույցում ասաց Մշակույթի նախարարության հասարակայնության հետ կապերի բաժնի պետ Գայանե Դուրգարյանը:
Նշենք, որ Վրաստանի մշակութային ժառանգության պահպանության ազգային գործակալությունն այս տարվա հուլիսին ՀՀ մշակույթի նախարարությանը գրավոր տեղեկացրել էր, որ Մուղնեցոց Սուրբ Գեւորգ եկեղեցու վերականգնման նախագծի մշակման նպատակով, եկեղեցու տարածքում տարվում են նախապատրաստական ուսումնասիրություններ: Գործակալության գլխավոր տնօրենի պաշտոնակատար Զուրաբ Միմինոշվիլու հավաստմամբ, նախագծի մշակման աշխատանքները ղեկավարում է փորձառու վերականգնող ճարտարապետ Շալվա Մելիքիձեն: Ներկա դրությամբ ավարտվել է հուշարձանի չափագրումը եւ իրականացվում են եկեղեցու հիմքի ինժեներա-երկրագիտական պայմանների ուսումնասիրման աշխատանքները:
Հարցին, թե ո՞ր կողմն է հոգում հուշակոթողի վերականգնման համար անհրաժեշտ ֆինանսները, Մշակույթի նախարարության հասարակայնության հետ կապերի բաժնի պետը պատասխանեց. «Ներկայումս վերականգնողական աշխատանքներից առաջ նախագծա-նախահաշվային աշխատանքներ են արվում: Ի սկզբանե նախատեսված էր, որ այս տարի պետք է կատարվեն նախագծային աշխատանքներ: Դա էլ իր ֆինանսական մասն է ենթադրում, որն իրականացնում է վրացական կողմը, քանի որ հուշակոթողն իրենց տարածքում է գտնվում: Իսկ հետագայում, երբ այդ փուլն ավարտվի, կարող են քննարկվել նաեւ այլ հարցեր»:
Դուրգարյանը հավելեց նաեւ, որ առաջիկա օրերին Թբիլիսի մեկնած հայկական պատվիրակությունը, որի կազմում են հայաստանցի հնագետներն ու այլ մասնագետներ, կվերադառնա Հայաստան եւ այցի արդյունքների վերաբերյալ ամբողջական տեղեկատվություն կտարածի: