Սոցիալիստական ինտերնացիոնալի խորհուրդը Նյու Յորքի ՄԱԿ գրասենյակում կայացած հանդիպման ժամանակ որոշել է քայլեր ձեռնարկել, որպեսզի Թուրքիային կոչ անի ճանաչել Հայոց ցեղասպանությունը։ Այս մասին հայտնում է Asbarez-ը։
Սոցինտերնի գլխավոր քարտուղար Լուիս Այալան Խորհրդին տեղյակ է պահել, որ վերջին 2 օրվա ընթացքում կազմակերպության ղեկավարությունը խորհրդատվություններ է անցկացրել Հայաստանի եւ Թուրքիայի անդամ կուսակցությունների հետ (ՀՅԴ եւ Ժողովրդա-հանրապետական կուսակցություն), որպեսզի համաձայնության գան օրակարգի այն կետի շուրջ, որն ընդունվել էր Ժնեւում կայացած խորհրդի նիստում։ Խոսքը «Հայոց ցեղասպանության հարցում Սոցինտերնի հայացքները՝ հաշվի առնելով մի շարք ազգային խորհրդարաններում եւ վերազգային ինստիտուտներում դրա ճանաչումը» վերտառությամբ կետի մասին է։
Այալան ավելի ուշ խորհրդին հայտնել էր, որ համաձայնությունը ձեռք է բերվել, եւ շնորհակալություն էր հայտնել Սոցինտերնի Հայաստանի եւ Թուրքիայի փոխնախագահներին Խորհրդին ներկայացված համաձայնության մեջ նրանց ունեցած ավանդի համար։
Գլխավոր քարտուղարն ասել է, որ Հայոց ցեղասպանության 100-ամյակի կապակցությամբ կազմակերպությունը ցանկանում է միջոցներ ձեռնարկել եւ քննարկումներ կազմակերպել Թուրքիայի եւ Հայաստանի կուսակցությունների, ինչպես նաեւ քաղաքացիական հասարակության եւ մտավորականության ներկայացուցիչների մասնակցությամբ։ Պետք է քննարկվի հարցը թե «Հայոց ցեղասպանության ճանաչումը հնարավոր կդարձնի արդյոք հայ-թուրքական իրական հաշտեցումը»։
