Արեւմտյան Ամերիկայի Հայ Դատի հանձնախումբը, ինչպես նաեւ Բըրբենքում, Գլենդելում, Հոլիվուդում եւ Լա Քրեսենտեում հանձնախմբի մասնաճյուղերը միաձայն աջակցություն են հայտնել Կալիֆորնիայի Օրենսդիր ժողովում Արդի Քասախյանի թեկնածությանը: Այս մասին գրում է «Asbarez»-ը:
«Մեր որոշումը հիմնավորված էր նրանով, որ Արդին բազմաթիվ տարիներ մասնակցել եւ հավատարմորեն ծառայել է Ամերիկայի հայ համայնքի կյանքին: Վստահ ենք, որ նա հետագայում նույնպես ամուր կկանգնի այդ հիմքի վրա»,- ասել է Հայ դատի հանձնախմբի ներկայացուցիչ Նորա Հովսեփյանը:
Քասախյանն իր հերթին նշել է. «Իմ ժառանգությունը մեծ դեր է ունեցել նրանում, ով ես դարձել եմ: Հպարտ եմ Արեւմտյան Ամերիկայի Հայ դատի հանձնախմբի աջակցությամբ»:
Արդի Քասախյանն իր նախընտրական արշավը սկսել է անցյալ տարի: Կալիֆորնիայի Օրենսդիր ժողովի սկզբնական ընտրությունները կայանալու են 2016 թվականի հունիսի 7-ին: