Ստամբուլի Սարըյերի շրջանի Սուրբ Հռիփսիմյանց եկեղեցու բակում օրեր առաջ Ռամադանի տոնական ճաշ կազմակերպելը բարկացրել է ստամբուլահայ համայնքին։

Ինչպես տեղեկացնում է Ստամբուլի հայկական «Ակոս»-ը. հուլիսի 9-ին, Ստամբուլի Սուրբ Հռիփսիմյանց եկեղեցու խորհրդի եւ Սարըյերի քաղաքապետարանի կողմից եկեղեցու բակում Ռամադանի տոնական ճաշ (սահուր) է տրվել։

Ավելի ուշ պարզվել է, որ Սուրբ Հռիփսիմյանց եկեղեցու խորհուրդը մուսուլմանների համար նախատեսված Ռամադանի ճաշ կազմակերպելու համար թույլտվություն չի ստացել Պոլսո հայոց պատրիարքարանից։

Պոլսո հայոց պատրիարքական ընդհանուր փոխանորդ, արք. Արամ Աթեշյանը նշել է նաեւ, որ հայ համայնքի որոշ ներկայացուցիչներ պնդել են, թե եկեղեցում նաեւ նամազ են արել։  Նա շեշտել է, որ եթե նման բան հաստատվի, իրենք այդ եկեղեցում ծառայության ուղարկված հոգեւորականին հետ կանչելուց բացի այլ պատժամիջոց չեն կարող կիրառել։