Գյումրիում այս գիշեր վթար է տեղի ունեցել` ռուսական ռազմաբազայի զինծառայողի մասնակցությամբ։ Մեր տեղեկություններով` կեսգիշերին մոտ պայմանագրային զինծառայող, 27-ամյա Ալեքսանդր Գալենտևը հարբած վիճակում վարել է իր «Մերսեդես» մակնիշի մեքենան եւ Շիրակացի փողոցում բախվել երեք մեքենայի, ապա թեթեւ վնասվածքով տեղափոխվել Գյումրու բժշկական կենտրոն:

Բժշկական կենտրոնի փոխտնօրեն Արմեն Խաչատրյանը NEWS.am–ին ասաց, որ ռուս զինծառայողն ամբուլատոր բուժում ստանալուց հետո դուրս է գրվել։

Շիրակի մարզի դատախազ Րաֆֆի Ասլանյանը մեզ հետ զրույցում նշեց, որ գործով զբաղվում է Ռազմական ոստիկանությունը, նախապատրաստվում են նյութեր։

«Եթե պարզվի, որ մեղավորը ռուս զինվորն է, գործը կուղարկեն ռուսական կողմին, էնտեղ վնասվածքներից է կախված. եթե ծանր մարմնական վնասվածք չեղավ, հնարավոր է` հանցակազմ չլինի, հանցագործ նույնպես»,– ասաց Ասլանյանը։

Բարեբախտաբար, եռակի վթարի հետեւանքով ուրիշ ոչ ոք չի տուժել։ Մեքենաներից մեկում վթարի պահին ընդհանրապես մարդ չի եղել։

Վթարի ենթարկված «Գազ 31» մակնիշի ավտոմեքենայի վարորդ Խաչատուր Գեւորգյանը NEWS.am -ի թղթակցի հետ զրույցում պատմեց, որ ինքը երթեւեկելիս է եղել Շիրակացի փողոցով եւ նկատել է, որ «Մերսեդեսը», որը դիմացից ընթանում է ուղիղ դեպի իր մեքենան։ Բախումից խուսափելու համար Խաչատուր Գեւորգյանը մեքենան փորձել թեքել է աջ , սակայն տեղի է ունեցել բախում, այնուհետեւ «Մերսեդեսն» առանց կանգնելու հեռացել է, Խաչատուր Գեւորգյանն էլ հետեւել է նրան,  քանի որ իր մեքենան վնասվել է, սակայն երբ հասել է «Մերսեդեսին», տեսել է, որ այն բախվել է եւս երկու մեքենայի: