Առանց Լեռնային Ղարաբաղի կարգավիճակի հստակեցման ղարաբաղյան հակամարտության համապարփակ լուծում հնարավոր չէ: Այս մասին այսօր՝ հուլիսի 20-ին, Երևանում լրագրողների հետ հանդիպմանը հայտարարեց ԵԱՀԿ Մինսկի խմբի ամերիկացի համանախագահ Ջեյմս Ուորլիքը:

«Առանց Լեռնային Ղարաբաղի կարգավիճակի հստակեցման հակամարտության համապարփակ լուծում հնարավոր չէ: Համապարփակ լուծման մեջ պետք է ներառված լինի կարգավիճակի հարցը, իսկ այդ կարգավիճակի որոշման համար անհրաժեշտ է Լեռնային Ղարաբաղի բնակչության ազատ կամարտահայտումը՝ որպես համապարփակ կարգավորման մի մաս»,- ասաց Ուորլիքը:

Ուորլիքը նաեւ մեկնաբանեց ռուսական «Վեդոմոստի» պարբերականին տված իր աղմկահարույց հարցազրույցը։

«Եթե դուք ուշադիր ընթերցեք «Վեդոմոստի» պարբերականին իմ տված հարցազրույցը, դուք կտեսնեք, որ այնտեղ ասում եմ՝ ոչ մի բան դեռեւս վերջնական համաձայնեցված չէ, քանի դեռ ամեն ինչ համաձայնեցված չէ։ Սա ի նկատի ունենք՝ ասելով համապարփակ կարգավորում: Այդ կարգավորման տարրերից մեկը պետք է լինի Լեռնային Ղարաբաղի հարակից տարածքների վերադարձը. սա կետերից մեկն է, բանակցությունների տարր», - հայտարարեց ամերիկացի դիվանագետը:

Հիշեցնենք, որ «Վեդոմոստի» թերթին տված հարցազրույցի ժամանակ Ուորլիքը հայտարարել էր, որ ղարաբաղյան հակամարտության կարգավորման համար պետք է միջազգային խաղաղապահ ուժեր մտցվեն տարածաշրջան, եւ նշել էր, որ «օկուպացված տարածքները պետք է վերադարձվեն Ադրբեջանին համալիր կարգավորման շրջանակներում»։