Դեռ հայտնի չէ, թե արդյոք Բելառուսի նախագահ Ալեքսանդր Լուկաշենկոն կմասնակցի՞ ՀԱՊԿ-ի Երեւանում կայանալիք գագաթաժողովին: Լրատվամիջոցների այս տեղեկատվության վերաբերյալ NEWS.am-ը փորձել է մեկնաբանություն ստանալ Բելառուսի նախագահի մամուլի ծառայությունից, սակայն նրանք հրաժարվել են որեւէ բան ասել: «Մենք չենք մեկնաբանում լրատվամիջոցներում հայտնված շշուկները, այլ միայն կոնկրետ տեղեկություն ենք տալիս: Համապատասխան տեղեկատվությունը կհայտնվի Բելառուսի նախագահի պաշտոնական կայքում, երբ դա նպատակահարմար համարվի»,- պատասխանել են Լուկաշենկոյի մամուլի ծառայությունում:
Նշենք, որ ՀԱՊԿ գագաթաժողովը կայանալու է օգոստոսի 20-22-ին Երեւանում: Ռուսական լրատվամիջոցները հաղորդում են, որ արդեն մի քանի օր է շատ լարված են Ռուսաստանի եւ Բելառուսի նախագահների հարաբերությունները:
Օգոստոսի 13-ին Լուկաշենկոն, պատասխանելով Մեդվեդեւի հանդիմանությանը, որ Բելառուսի նախագահի չի կատարում իր խոստումը եւ չի ճանաչում Աբխազիայի եւ Հարավային Օսիայի անկախությունը, մեղադրել է ՌԴ նախագահին անբարեխղճության մեջ: Ի պատասխան, Մեդվեդեւի օգնական Սերգեյ Պրիխոդկոն պատրաստակամություն է հայտնել հրապարակել ՀԱՊԿ գագաթաժողովում Լուկաշենկոյի ելույթի սղագրությունը, որտեղ նա ոչ միայն խոստանում է ճանաչել Աբխզիայի եւ Հարավային Օսիայի անկախությունը, այլ նաեւ այլ հայտարարություններ է անում, որոնք «անհետաքրքիր չեն լինի ինչպես Բելառուսի, այնպես էլ միջազգային հանրության համար»: Օգոստոսի 2-ին Սոչիում լրագրողների հետ հանդիպման ժամանակ Ռուսաստանի նախագահը մեջբերել է Լուկաշենկոյի խոսքերը Աբխազիայի եւ Հարավային Օսիայի մասին, որը նա ասել է 2008-ին ՀԱՊԿ գագաթաժողովում: «Նա ասել է. «Ես հանդիսավորությամբ խոստանում եմ, որ կանեմ ամեն ինչ ամենակարճ ժամանակում»,- հիշեցնում է «Կոմերսանտը»:
Իսկ ահա Բելառուսի նախագահն օգոստոսի 13-ին հայտարարել է, որ Մեդվեդեւը «ինչ-որ բան կիսատ է ասում»: «Լուկաշենկոն ոչ մի տեղ հանդիսավորությամբ չի խոստացել եւ ոչ ոք դա չի լսել: Լուկաշենկոն խոսել է ճանաչման մասին, բայց միայն հետեւյալ կոնտեքստում. Եթե Ռուսաստանը պատասխան քայլեր ձեռնարկեր, իրավիճակն այլ կլիներ»,- ասել է Լուկաշենկոն: