Գյումրիում տեղակայված 102-րդ ռուսական ռազմաբազայի պետ, գեներալ-մայոր Վլադիմիր Ուստինովը դատարանում ցուցմունք է տվել Վալերի Պերմյակովի գործով: Հիշեցնենք, որ բազայի պետը ներկայացնում է տուժող կողմը (ֆոտոռեպորտաժ):
Գեներալ-մայորը հիշեցրել է, որ Վալերի Պերմյակովի գործողությունների կապակությամբ հետաքննություն է ընթացել: Զինծառայողը Գյումրիում է եղել 2014թ. դեկտեմբերի 3-ից:
Հունվարի 11-ին Պերմյակովը սահմանված կարգով անցել է հերթապահության: Ժամը 3:20-ին զորամասի հրամանատարին զեկուցել են, որ փշալարե ցանկապատը ճեղքված է, եւ հայտնաբերվել է բաճկոն ու գլխարկ-սաղավարտ: Հայ իրավապահների հետ համագործակցելով՝ սկսվել են որոնումները:
Ժամը 11:45 տեղեկություն է ստացվել այն մասին, որ սեփական տներից մեկում սպանված քաղաքացիներ են հայտնաբերվել: Դեպքի վայրի զննության ընթացքում հայտնաբերվել էր ինքնաձիգ, սվին-դանակ, փամփուշտներ եւ Պերմյակովի հագուստն ու կոշիկները:
Բազայի պետի խոսքով՝ մինչեւ միջադեպը Պերմյակովից ոչ մի բողոք չի եղել: Առողջական վիճակը լավ էր, բուժօգնության համար երբեք չի դիմել, գործընկերների հետ նորմալ ընկերական հարաբերություններ է ունեցել: Տեղի բնակիչների հետ շփումներ չեն նկատվել:
Ինչպես պնդում է գեներալը, հունվարի 11-ին Պերմյակովը ընկերներից եւ ծանոթներից հաղորդագրություն չի ստացել: Վալերի Պերմյակովը լքել է բազայի տարածքը առանց հարգելի պատճառների, արձանագրեց գեներալ-մայորը:
Նշենք, որ Գյումրիում հունվարի 12-ին Ավետիսյանների սպանության մեջ մեղադրվող ռուս զինծառայող Վալերի Պերմյակովի դատարավարությունը մեկնարկել է Գյումրիում: ՌԴ Հյուսիսկովկասյան մարզային զինվորական դատարանի ենթակայության ներքո գտնվող ռուսական կայազորային զինվորական դատարանը մեղադրյալի նկատմամբ վճիռ է կայացնելու երեք մեղադրանքներով՝ զենքով դասալքություն, զենքի եւ զինամթերքի հափշտակություն եւ զենքի եւ զինամթերքի անօրինական ձեռքբերելը, փոխանցելը, պահելը, տեղափոխելը կամ կրելը:
Սպանության մասով քրեական գործով կզբաղվեն հայկական դատական մարմինները: