Լիբանանի խորհրդարանի պատգամավորները դարձյալ չեն կարողացել հանրապետության նախագահ ընտրել։ Պլաս դ՛Էթուալ պալատում հավաքված օրենսդիրների թիվը դարձյալ բավարար չի եղել քվեարկության համար։ Քվորումի բացակայության հետեւանքով խոսնակ Նաբիհ Բերին արդեն 27-րդ անգամ հետաձգել է հանրապետության նախագահի ընտրությունը։ Ժողովրդի ընտրյալներին առաջարկվել է ներկա լինել սեպտեմբերի 2-ի նիստին։
Բարձրագույն պետական պաշտոնը թափուր է անցյալ տարվա մայիսի 25-ից ի վեր, երբ Միշել Սուլեյմանը հեռացավ նախագահական պալատից։ Լիբանանի կրոնական կառուցվածքի համաձայն, պետության ղեկավարի պաշտոնին առաջադրվում է մարոնիթների համայնքի ներկայացուցիչը․ մարոնիթները տեղի քրիստոնյաների շրջանում մեծամասնություն են կազմում։ Ինչպես նշել է Նահարնետ տեղեկատվական կայքը, քվեարկության անցկացման համար անհրաժեշտ է, որ դահլիճում ներկա լինի 128 պատգամավորից առնվազն 86-ը, փոխանցում է ՏԱՍՍ-ը։
Ընտրությունները ձախողվում են խորհրդարանում խոշորագույն քրիստոնեական խմբակցության բոյկոտի պատճառով։ Խմբակցությունը ղեկավարում է Ազատ հայրենասիրական շարժման առաջնորդ Միշել Աունը։ Աունի կողմնակիցները փորձում են հասնել ընտրական նոր օրենսգրքի ընդունմանը եւ նախագահի ընտրությունից առաջ խորհրդարանական նոր ընտրությունների անցկացմանը։ «Պատգամավորների պալատն իր ներկա վիճակում չի կարող երկրի ղեկավար ընտրել», -համարում է ԱՀՇ-ի առաջնորդը։
ԱՀՇ-ի ակտիվիստներն այսօր նոր հակակառավարական ցույց են նախապատրաստում Բեյրութի կենտրոնում։ Նրանք երկրի ղեկավարի պարտականությունները կատարող վարչապետ Թամամ Սալամին մեղադրում են «նախագահի իրավասությունների բռնի յուրացման համար»։
