Նույնասեռ ամուսնությունները պետք է թույլատրվեն՝ ըստ Մարդու իրավունքների եվրոպական դատարանի: Այս մասին այսօր՝ օգոստոսի 25-ին, Երեւանում լրագրողների հետ հանդիպմանն ասաց Վենետիկի հանձնաժողովի անդամ Քրիստոֆ Գրաբենվարտերը՝ պատասխանելով հարցին, թե Երեւանում կայացած հանդիպումների ընթացքում ինչ համաձայնության են եկել Սահմանադրական փոփոխությունների հանձնաժողովի հետ միասեռ ամուսնություններին վերաբերող հոդվածների շուրջ:
«Մեր մեկնաբանությունը որեւէ կերպ ուղղված չի եղել ընտանիքի պաշտպանության կամ ամուսնության իրավունքների սահմանափակմանը: Դա պարզապես տեղեկատվություն է Հայաստանի իշխանություններին, որ ըստ Մարդու իրավունքների եվրոպական դատարանի՝ նույնասեռ ամուսնությունները պետք է թույլատրվեն: Այս պահին դա է եվրոպական ստանդարտը: Այս շրջանակներում պետք է մեր առաջարկությունը դիտարկել»,-ասաց հանձնաժողովի անդամը:
Նշենք, որ Վենետիկի հանձնաժողովն ավելի վաղ իր առաջարկություններում նշել էր, որ Սահմանադրության նոր նախագծի 34-րդ եւ 15-րդ հոդվածները չպետք է ընկալվեն՝ որպես միասեռ ամուսնությունների արգելք:
