Գյուղատնտեսության նախարար Սերգո Կարապետյանն այսօր՝ օգոստոսի 26-ին, Կոտայքում ծանոթացել է պտղատու այգիներում եւ նորակառույց ջերմոցային տնտեսությունում իրականացվող աշխատանքներին:
Նախարարության տեղեկատվության եւ հասարակայնության հետ կապերի բաժնից հայտնում են, որ նախարարը նախ մեկնել է Ալափարս համայնք, որտեղ եղել է Սերգեյ Գրիգորյանի կողմից 5 հեկտարի վրա հիմնված ազնվամորու այգում, որից 2 հեկտարը մշակվում է ՀՀ գյուղատնտեսության նախարարության գյուղատնտեսական ծրագրերի իրականացման գրասենյակի աջակցությամբ։ Ընկերության տնօրենի խոսքով՝ այգում մեկ հեկտարի բերքատվությունը կազմում է 4-5 տոննա բերք:
Սերգո Կարապետյանն այնուհետեւ այցելել է Նոր Գեղի համայնքի 20 հեկտարի վրա հիմնված խնձորի այգիներ, որոնց մշակումն իրականացվում է 5 սեփականատերերի կողմից ստեղծված կոոպերատիվի կողմից: Կոոպերատիվի ներկայացուցիչ Սաշա Հովհաննիսյանը տեղեկացրել է, որ այգում մշակվում է յոթ սորտի խնձոր եւ սեպտեմբերի վերջին կսկսվի բերքահավաքը, արտադրանքն իրացվում է հանարապետությունում եւ ռուսական շուկայում։
Նախարարը եղել է նաեւ 3.2 հեկտարի վրա կառուցվող ելակի արտադրության ջերմոցային տնտեսությունում: Կենսատեխնոլոգ Արամ Ղեւոնդյանի տեղեկացմամբ՝ ելակի սածիլներն օրերս կներկվեն Հոլանդիայից, ելակի աճեցումը կատարվելու է անհող աճեցման ժամանակակից եղանակով:
Նախարարն այցելել է նաեւ Աբովյանում գործող եվրոպական արտադրության նորագույն տեխնոլոգիաներով հագեցած սնկի արտադրության եւ վերամշակման «Առողջ սունկ» ՍՊԸ:
Սնկի արտադրամասում նախարարի շրջայցի ընթացքում ընկերության տնօրեն Արեգ Ազոյանը տեղեկացրել է, որ վերջին տարիներին այստեղ արձանագրվել է պատրաստի հումքի, թարմ սնկի եւ սնկի պահածոների արտահանման դինամիկ աճ՝ անցյալ մեկ տարվա ընթացքում հատելով 1 միլիարդ դրամի արտահանման շեմը: Նա նաեւ հավելել է, որ ընկերությունում արտադրվում են թարմ շամպինյոն, կախասունկ եւ պորտոբելլո տեսակի սնկեր, տարեկան արտադրության ծավալը կազմում է շուրջ 960 տոննա: