Չնայած որոշ հայկական տուրիստական գործակալությունների հայտարարած բոյկոտին՝ Անթալիայի տոմսեր չվաճառել, 2010-ին, նախորդ տարվա համեմատ ավելի շատ հայ է նախընտրել Թուրքիան։
2010-ի առաջին 7 ամսում Թուրքիա այցելած զբոսաշրջիկների քանակը նախորդ տարվա նույն ժամանակահատվածի համեմատ աճել է 6,67 տոկոսով՝ կազմելով 15 մլն 930 հազար։ Թուրքիայում իրենց հանգիստը նախընտրած գերմանացիներից հետո քանակով 2-րդը ռուսներն են՝ 1մլն 793 հազար, այնուհետ անգլիացիներն ու իրանցիները։
Թուրքիայի մշակույթի եւ տուրիզմի նախարարության տվյալների համաձայն՝ նախորդ տարվա նույն ժամանակահատվածի համեմատ 40 տոկոսով պակասել են իսրայելցի զբոսաշրջիկները, որը կապված է թուրք-իսրայելական լարված հարաբերությունների հետ։ Միայն հուլիս ամսին՝ Իսրայելից եկած զբոսաշրջիկների քանակը նվազել է 89 տոկոսով։ Դրա փոխարեն ավելացել է Մերձավոր Արեւելքից Թուրքիա այցելողների քանակը։
Միայն հուլիս ամսին Թուրքիա այցելած հայաստանցի զբոսաշրջիկների թիվը կազմել է 10 380, որը 3,45 տոկոսով ավելի է նախորդ եւ 17 տոկոսով 2008-ի նույն ժամանակահատվածի համեմատ։ Հունիսին եւս նախորդ տարվա նույն ժամանակահատվածի համեմատ Հայաստանից Թուրքիա մեկնողների աճ է գրանցվել։ Իսկ 2010-ի հունվար-մայիս ամիսների ընթացքում Թուրքիա է այցելել ընդհանուր առմամբ, 17 հազար 315 հայաստանցի, որը 10 տոկոսով ավելի է 2009-ի համեմատությամբ։