Գերմանիայի Բունդեսթագի՝ Հայոց ցեղասպանության մասին բանաձեւը կընդունվի այս աշնանը։ Այս մասին սեպտեմբերի 22-ին՝ հայ-թուրքական հաշտեցման «Գործելով միասին» ծրագրի առաջին փուլին նվիրված մամուլի ասուլիսի ժամանակ, հայտարարեց Հայաստանում Գերմանիայի դեսպան Մաթիաս Քիսլերը՝ անդրադառնալով Բունդեսթագում Ցեղասպանության ընդունման բանաձեւին։
«Գործընթացներն ընթանում են խորհրդարանում, բայց ես չեմ կարող նշել բանաձեւի ընդունման կոնկրետ օրը»,- հավելեց Քիսլերը։ Նրա խոսքով՝ 2015թ. շատ կարեւոր տարի է Հայաստանի համար։ Դեսպանը հիշեցրել է Գերմանիայի նախագահ Յոախիմ Գաուքի, Բունդեսթագի նախագահ Նորբերթ Լամերթի ելույթները։ «Գերմանիայում այդ թեմայով բուռն քննարկումներ են եղել։ Թեման շատ կարեւոր է Գերմանիայի տարբեր ոլորտների համար։ Սաքսոնիայի մշակույթի նախարարը հիմա Երեւանում է։ Մենք նրա հետ այցելել են Հայոց ցեղասպանության թանգարան-ինստիտուտ։ Դա շատ հուզիչ էր մեզ համար»,- նշեց Քիսլերը։
Դեսպանի խոսքով՝ Սաքսոնիայի մշակույթի նախարարը նրան հայտնել է, որ այդ հողում պատրաստում են պատմության նոր դասագրքեր, որոնց գլուխներից մեկը նվիրված է լինելու անցյալ դարի ցեղասպանություններին, այդ թվում՝ Հայոց ցեղասպանությանը։ Դիվանագետը նաեւ ընդգծել է, որ հայ-թուրքական հաշտեցումը չպետք է կախված լինի այս կամ այն խորհրդարանի կամ երկրի ճանաչումից։