Հայաստանի Զինված ուժերն ու ազգային անվտանգության համակարգն ի վիճակի են համարժեք պատասխան տալ Լեռնային Ղարաբաղի տարածքում իրականացվող սադրանքներին։ Այս մասին սեպտեմբերի 30-ին՝ ՀԱՊԿ «Անխախտելի եղբայրություն 2015» զորավարժությունների բացման ժամանակ, լրագրողների հետ զրույցում ասաց ՀԱՊԿ գլխավոր քարտուղարի տեղակալ Վալերի Սեմերիկովը։
Պատասխանելով ՀԱՊԿ համապատասխան արձագանքի բացակայության մասին հարցին՝ Սեմերկովը նշեց, որ հավաքական ուժերը գործի դնելու հետ կապված յուրաքանչյուր գործողության համար պետք է Հավաքական անվտանգության խորհրդի որոշումը։ Իսկ այն, որ արձագանք չի եղել, Սեմերիկովի կարծիքով, հնարավոր է այն պատճառով է, որ դեռ այդքան էլ երկար ժամանակ չի անցել։
«Համենայն դեպս տարածաշրջանում ձեւավորվող խնդրի ողջ սրության մասին նախագահ Սերժ Սարգսյանը բարձրաձայնել է Դուշանբեի գագաթնաժողովում։ Պետության ղեկավարները հարցին մեծ ուշադրություն են հատկացրել։ Իսկ ՄԱԿ Գլխավոր ասամբլեայում Հայաստանի արտգործնախարարը ՀԱՊԿ գործընկերների նախարարական հանդիպմանը ներկայացրել է խնդիրը»,- նշեց Վալերի Սեմերիկովը՝ եւս մեկ անգամ ընդգծելով, որ հիմա որոշում կայացնելն իրատեսական չէ. դրա համար քաղաքական որոշում է անհրաժեշտ, որը կայացնում են կանոնադրական մարմինները։ «Կանոնադրական մարմիններն անուշադրության չեն մատնում ստեղծված իրավիճակը»,- վստահեցրել Սեմերիկովը։