Իրանի փոխնախագահ Համիդ Բաղայիի հայտարարությունը նորից փաստում է որ Իրանի ներկայիս քաղաքական իստեբլիշմենթը՝ նախագահ Ահմադիժենադի գլխավորությամբ ճանաչել է 20-րդ դարասկզբին Օսմանյան Թուրքիայի կողմից իրականացված Հայոց ցեղասպանությունը։ NEWS.am-ի թղթակցի հետ զրույցում այս մասին ասաց «Բարգավաճ Հայաստանի» կուսակցության քարտուղար Արամ Սաֆարյանը։
Ողջունելով Իրանի ղեկավարության նման դիրքորոշումը, պատգամավորը նշեց, որ համաձայն արեւելագետ Էմմա Բեկիջյանի հետազոտությունների, Իրանի հասարակությունը եւ այդ երկրի գիտական միտքը վերջին 18 տարվա ընթացքում հաճախ է անդրադառնում Հայոց ցեղասպանության հարցին։
«Իսկ դա նշանաուկմ է, որ Իրանի ժողովուրդը ճանաչում է պատմական իրողությունը, իսկ փոխնախագահի վերջին հայտարարությունը հիմնված է հենց այդ քաղաքացիական դիրքորոշման եւ իրանցի գիտնականների բազմաթիվ ուսումնասիրությունների վրա»-նշեց Սաֆարյանը։
Նշենք, որ Իրանի փոխնախագահ Համիդ Բաղային հայտարարել է, որ մոտ 100 տարի առաջ 1915-ին Թուրքիան ցեղասպանություն է իրականացրել հայերի նկատմամբ, ու թեեւ հիմա Օսմանյան կառավարությունը չկա, սակայն Հայաստանը պահանջում է, որպեսզի Թուրքիան պաշտոնապես ներողություն խնդրի եւ փոխհատուցի կատարվածի համար:
