Սոցիալ դեմոկրատ hնչակյան կուսակցությունը կողմ է քվեարկելու սահմանադրական փոփոխությունների նախագծին: Այս մասին այսօր՝ հոկտեմբերի 17-ին, լրագրողներին ասաց ՍԴՀԿ Հայաստանի վարչության ատենապետ Նարեկ Գալստյանը:
«Խորհրդարանական կառավարման համակարգը մեկ քայլ առաջ է, բայց դրա պտուղները քաղելու համար պետք է քաղաքական կամք: Ամեն ինչ հրաշալի է լինելու, բոլոր խնդիրները լուծվելու են, եթե լինի քաղաքական կամք»,- ասաց Նարեկ Գալստյանը:
Կուսակցության ատենապետի խոսքով՝ երկրին արմատական փոփոխություններ են անհրաժեշտ: Դրանց իրականացումը, ըստ նրա, կախված չէ Սահմանադրությունից. եթե քաղաքական կամքը բացակայի, ոչ գործող, ոչ էլ այլ Սահմանադրության «պտուղները քաղել» հնարավոր չի լինի:
ՍԴՀԿ-ն կհամագործակցի «Այո»-ի ճակատի ուժերի հետ, թե ոչ, Նարեկ Գալստյանի խոսքով, պարզ կլինի այսօր Երեւանում մեկնարկած 10-րդ համագումարի փակ նիստերի քննարկումներից հետո:
Վարչության ատենապետը ողջունեց սահմանադրական փոփոխությունների դեմ պայքարող՝ «Ոչ»-ի ճակատի քաղաքական ուժերի՝ իշխանափոխություն իրականացնելու մտադրությունը, միեւնույն ժամանակ նշելով, որ նրանցից դեռ ոչ մի «հոդաբաշխ բացատրություն» չի լսել այն մասին, թե ինչու են դեմ սահմանադրական փոփոխություններին:
Նշենք, որ այսօր մեկնարկել է ՍԴՀԿ 10-րդ համագումարը: Մի քանի օր փակ նիստեր տեղի կունենան, ինչից հետո կուսակցությունը հանդես կգա իր առաջիկա ծրագրերի վերաբերյալ հայտարարությամբ: