ՀՀ ֆինանսների նախարարությունում, այսօր՝ հոկտեմբերի 20-ին, ստորագրվել է «Երեւանի քաղաքային լուսավորության ծրագիր» դրամաշնորհային համաձայնագիրը, որի շրջանակում Վերակառուցման եւ զարգացման եվրոպական բանկը Արեւելյան Եվրոպայի էներգախնայողության եւ շրջակա միջավայրի գործընկերության հիմնադրամի միջոցներից Հայաստանի Հանրապետությանը կհատկացնի 1 միլիոն 900 հազար եվրո գումարի չափով դրամաշնորհ:
Ֆիննախից NEWS.am-ին հայտնեցին, որ ծրագրի հիմնական նպատակն է` Երեւան քաղաքում ունենալ Էներգախնայող եւ անվտանգ արտաքին լուսավորության ցանց: Մասնավորապես, նախատեսվում է մայրաքաղաքի 28 փողոցներում հենասյուների փոխարինում, մալուխների ստորգետնյա անցկացում, էներգախնայող լամպերի օգտագործում, ինչպես նաեւ կառավարման ավտոմատացված համակարգի ներդնում: Ծրագրի կապիտալ ներդրումների ընդհանուր արժեքը կազմում է մոտ 6 մլն ԱՄՆ դոլար: Ծրագրի ֆինանսավորման նպատակով Հայաստանի եւ ՎԶԵԲ-ի միջեւ դեռեւս 2015թ. մայիսի 11-ին ստորագրվել է «Երեւանի քաղաքային լուսավորության ծրագիր» վարկային համաձայնագիրը` 4 մլն ԱՄՆ դոլար արժողությամբ:
