Ներկայում Ադրբեջանը պատրաստ չէ ընդունել ղարաբաղյան հակամարտության կարգավորման շուրջ այն կառուցողական առաջարկները, որոնք արդեն գոյություն ունեն: NEWS.am-ի թղթակցի հետ զրույցում այս մասին հայտարարեց Աշխարհաքաղաքական վերլուծության եվրոպական կենտրոնի ղեկավար, լեհ փորձագետ Մատեուշ Պիսկորսկին:
Անդրադառնալով մինչեւ այս տարեվերջ Հայաստանի եւ Ադրբեջանի նախագահների հանդիպման հնարավորությանը՝ նա նշեց. «Բարձր մակարդակով հանդիպումն իմաստ ունի միայն այն դեպքում, եթե ղարաբաղյան հակամարտության կարգավորման հարցով հստակ առաջարկներ կան: Իրականում բոլոր կողմերի համար ընդունելի առաջարկների մշակման համար լավագույն հարթակը ԵԱՀԿ Մինսկի խումբն է»:
Փորձագետը նշեց նաեւ, որ վերջին տարիներին Հայաստանի ղեկավարությունը բավական կառուցողական մոտեցում է ցուցաբերում տարբեր առաջարկների հանդեպ: «Սակայն, ցավոք, Ադրբեջանի ղեկավարությունը մինչեւ հիմա արգելափակել է երկխոսության հնարավորությունը: Ադրբեջանի կոմից իսկական քաղաքական կամք է անհրաժեշտ: Իհարկե, առաջին հերթին հարկավոր է դադարեցնել ղարաբաղյան հակամարտության գոտու շփման գծում ադրբեջանական կողմից հրադադարի ռեժիմի խախտման դեպքերը»,- հավելեց Մատեուշ Պիսկորսկին:
Հիշեցնենք, որ հոկտեմբերի 26-ին նախանշված է ԵԱՀԿ Մինսկի խմբի համանախագահների այցը Երեւան: Հոկտեմբերի 28-ին նրանք կայցելեն Ադրբեջան: