Հայաստանը չպետք է մի իրավիճակում հայտնվի, երբ ստիպված կլինի ընտրություն կատարել՝ կա՛մ Եվրոպա, կա՛մ եվրասիական տարածաշրջան: Այս մասին NEWS.am-ի թղթակցի հետ զրույցում հայտարարեց Սլովակիայի էկոնոմիկայի նախարար Վազիլ Գուդակը:
Նրա խոսքով, հարկավոր է ազատ առեւտրի բազմակողմ գոտիներ զարգացնել: «Քանի որ Հայաստանը նաեւ Եվրասիական տնտեսական միության անդամ է, որոշակի դժվարություններ են առաջանում Եվրամիության հետ ազատ առեւտրի գոտի մտնելու հնարավորության հետ կապված: Բայց մենք Սլովակիայի կողմից պրագմատիկ մոտեցման կողմնակից ենք: Մենք ասում ենք, որ ԵՏՄ անդամ հանդիսացող երկրները, ինչպիսին Հայաստանն է, չպետք է մի իրավիճակում հայտնվեն, երբ ստիպված են ընտրություն կատարել՝ կա՛մ Եվրոպա, կա՛մ եվրասիական տարածաշրջան»,- ընդգծեց Վազիլ Գուդակը:
Հիշեցնենք, որ հոկտեմբերի 12-ին Լյուքսեմբուրգում ԵՄ անդամ պետությունների ԱԳ նախարարները Հայաստանի եւ Եվրամիության միջեւ բանակցություններ սկսելու մանդատ են ընդունել՝ հետագա փոխգործակցության շուրջ նոր համաձայնագիր կնքելու համար:
