Հոկտեմբերի 28-ի լույս 29-ի գիշերը Բաշկիրիայի Սալավաթ քաղաքում երիտասարդների միջեւ վիճաբանությունը կենցաղային հողի վրա է բռնկվել: Այդ մասին NEWS.am-ի թղթակցին հայտնել է Ռուսաստանի հայերի միության Բաշկիրիայի ռեգիոնալ բաժանմունքի նախագահ Արկադի Դալարյանը:
Նրա խոսքով, դիմակներ հագած մարդիկ մտել են ավտոսերվիս ու կրակել այնտեղ գտնվողների վրա: Հրազենային վնասվածք ստացած 7 մարդու հիվանդանոց են տեղափոխել: «Նրանցից մեկը՝ ավտոսերվիսի սեփականատեր Արթուր Սարգսյանը, մահացել է, իսկ երկուսի վիճակը կայուն ծանր է: Տեղական իշխանությունները՝ ի դեմս Առողջապահության նախարարության, բժիշկների, անում են հնարավոր եւ անհնար ամեն ինչ տուժածներին օգնելու համար: Մենք որեւէ ազգային նշան չենք տեսնում այստեղ: Իրականում այդ ամենը կենցաղային հողի վրա է կատարվել»,- շեշտել է Դալարյանը: Ռուսաստանի հայերի միության Բաշկիրիայի ռեգիոնալ բաժանմունքի ղեկավարը վստահեցրել է, որ իրենք արդարացի հետաքննություն են պահանջելու ու հետամուտ են լինելու, որ այս իրավիճակից ելք գտնվի առանց նոր միջադեպերի ու ճգնաժամի:
«Հարուցված է քրեական գործ, ընթանում է հետաքննություն: Գործով զբաղվում են բոլոր իրավապահ մարմինները: Տեղեկություն կա մեկ ձերբակալվածի մասին, բայց այն դեռ հաստատված չէ»,- հավելել է Արկադի Դալարյանը:
Քրեական ողբերգությունը տեղի է ունեցել հոկտեմբերի 28-ի լույս 29-ի գիշերը Բաշքիրիայի Սալավաթ քաղաքում: Անհայտ մարդկանց մի խումբ՝ դիմակներ հագած, մոտեցել է Սեվերնայա փողոցի վրա գտնվող ավտոսերվիսին ու կրակել յոթ մարդու վրա: Հարձակման զոհերն են դարձել տեղական գործարարն ու նրա ընկերները, որոնք բոլորը հիմա հիվանդանոցում են: Տուժածներին են Ա. Ոսկանանը, Տ. Ոսկանյանը, Ս. Գրիգորյանը, Մ. Մալոմյանը ( գտնվում է վերակենդանացման բաժանմունքում ), Ա. Ավետյանը (վերակենդանացման բաժանմունքում է), Ա. Ակուլյանը ( վերակենդանացման բաժանմունքում է) : Ավտոսերվիսի տերը՝ Ա. Սարգսյանը, մահացել է Սալավաթի քաղաքային հիվանդանոցում՝ գլխին ստացած հրազենային վնասվածքից:
