Հայաստանի Ազգային ժողովն այսօր՝ նոյեմբերի 16-ին, իր հերթական քառօրյա նիստերի մեկնարկից առաջ մեկ րոպե լռությամբ հարգել է Փարիզում ու Բեյրութում տեղի ունեցած ահաբեկչությունների զոհերի հիշատակը:
ԱԺ նախագահ Գալուստ Սահակյանն իր խոսքում դատապարտել է Փարիզում ու Բեյրութում տեղի ունեցած արյունոտ իրադարձությունները՝ նշելով. «Մենք խստորեն դատապարտում ենք ու մերժում ահաբեկչության ցանկացած դրսևորում»: Նա նաեւ անկեղծ վշտակցություն է հայտնել Ֆրանսիայի ու Լիբանանի ժողովրդին:
Հիշեցնենք, որ նոյեմբերի 13-ի երեկոյան Փարիզում ահաբեկչության շարքի հետեւանքով պաշտոնական տվյալներով, մահացել է առնվազն 132 մարդ: Լրատվամիջոցները հայտնում են 150-ից ավելի զոհերի մասին: Փարիզի ոստիկանությունը տեղեկություններ ունի 8 ահաբեկչի մասին, որոնք մահացել են: Նրանցից 7-ը իրենց պայթեցրել են «շահիդի գոտիով», հայտնել է քննությանը մոտ կանգնած աղբյուրը:
Ֆրանսիայի ողջ տարածքում արտակարգ դրություն է հայտարարվել: