2015 թ․ նոյեմբերի 18-ին, ժամը 13.30-ին ադրբեջանական կողմը ԼՂՀ-ին է հանձնել պայմանագրային զինծառայող, շարքային Անդրանիկ Արարատի Գրիգորյանին։
Ղարաբաղյան կողմին Գրիգորյանի հանձնումն իրականացվել է Լեռնային Ղարաբաղի Հանրապետությունում ԿԽՄԿ առաքելության միջնորդությամբ՝ Բաշ Քարվենդ բնակավայրի մոտ։
Ազատազրկման ընթացքում, ԿԽՄԿ-ն պարբերաբար այցելել է ռազմագերուն՝ դիտարկելու կալանավորման պայմանները, նրա հետ վերաբերմունքը եւ ապահովելու կապը ընտանիքի հետ: Գործելով որպես չեզոք միջնորդ եւ իր մանդատի համաձայն ԿԽՄԿ-ն աջակցել է այս գործողությանը ելնելով Ադրբեջանի իշխանությունների վերադարձի որոշման հիման վրա եւ լիարժեք համագործակցելով բոլոր կողմերի հետ։
Մինչեւ վերադարձը ռազմագերին հավաստիացրել էր ԿԽՄԿ-ի աշխատակիցներին, որ վերադառնում է իր հոժար կամքով։ Հիմնվելով Ժնեւյան կոնվենցիաներով սահմանված իր մանդատին՝ ԿԽՄԿ-ն Ղարաբաղյան հակամարտության հետ կապված տարածաշրջանում գործում է 1992 թ-ից ի վեր։
Հիշեցնենք, որ մարտի 22-ին՝ ժամը 13:50-ի սահմաններում, ՊԲ արեւելյան ուղղությամբ տեղակայված զորամասերից մեկի մարտական դիրքից, զենք-զինամթերքը թողնելով մարտական հենակետում, հակառակորդի կողմն է անցելՊԲ զինծառայող, 1991թ. ծնված շարքային-պայմանագրային Անդրանիկ Արարատի Գրիգորյանը: Հաջորդ օրը ադրբեջանական լրատվամիջոցները, խախտելով միջազգային մարդասիրական իրավունքը, տարածել էին նրա հետ «հարցազրույցը» եւ «սահմանն անցնելու» պահը։ ԼՂՀ ՊԲ-ն դա կեղծիք էր որակել։
