«Իմ Հայաստան» ծրագիրը շատ հստակ նպատակ ունի. մենք ուզում ենք, որ Հայաստանը զբոսաշրջության առաջատար կենտրոն դառնա: Այս մասին «Իմ Հայաստան» ծրագրի մեկնարկին նվիրված միջոցառման շրջանակում լրագրողների հետ զրույցում նոյեմբերի 20-ին հայտնել է Հայաստանում USAID գրասենյակի տնօրեն Կարեն Հիլիարդը:
Այս պահին, նրա խոսքով, Հայաստան այցելող զբոսաշրջիկները հիմնականում ժամանակ են անցկացնում Երեւանում : «Սա նշանակում է, որ զբոսաշրջության օգուտներն ու եկամուտները գրեթե անհասանելի են հանրապետության մարզերի բնակչության համար»,- շեշտել է Հիլիարդը: Ըստ Հայաստանում USAID գրասենյակի ղեկավարի՝ «Իմ Հայաստան» ծրագրի շրջանակում ծրագրված է ձեւավորել Հայաստանի զբոսաշրջային տեսարժան վայրերի ցանց : «Մենք ուզում ենք, որ հնարավորինս շատ զբոսաշրջիկներ այցելեն Հայաստան, ավելի երկար մնան երկրում ու ավելի շատ գումար ծախսեն»,- հավելել է Կարեն Հիլիարդը:
«Իմ Հայաստան» ծրագիրը իրականացվում է ԱՄՆ միջազգային զարգացման գործակալության ու Սմիթսոնի ինստիտուտի համագործակցության շրջանակում : Դրա նպատակն է խթանել Հայաստանի ազգային մշակույթի պահպանումը՝ ամբողջ երկրում մշակութային զբոսաշրջության զարգացման միջոցով:
