Նոյեմբերի 13-ին Փարիզում տեղի ունեցած ահաբեկչական հարձակումներից մեկի ժամանակ արտառոց դեպք է գրացվել:
Բուժեղբայրն առաջին բուժօգնություն է ցույց տվել ահաբեկիչներից մեկին՝ կարծելով, որ օգնում է տուժած հաճախորդի: Comptoir Voltaire սրճարանի բացօթյա հատվածում Դավիդ անունով բուժեղբայրը, որն աշխատում է Փարիզի հիվանդանոցներից մեկում, սրճարանի ներսում ընթրում էր ընկերոջ հետ, երբ դրսից լսում է պայթյունը:
«Ամբողջ տարածքը լցվել էր ծխով, կարծեցի տաքացուցիչներից մեկն է պայթել, միանգամից բղավեցի՝ անջատեք գազն ու վազեցի դուրս»,- Reuters-ին պատմել է Դավիդը:
Դրսում 46-ամյա բուժեղբայրը նախ օգնություն է ցույց տվել վիրավորված մի կնոջ ու տղամարդու, ապա մոտեցել Աբդեսլամին՝ ահաբեկիչներից մեկին. «Այդ պահին մտքովս չանցավ, որ նա կարող է մահապարտ ահաբեկիչ լինել: Նա նման էր մյուս բոլոր հաճախորդներին եւ պառկած էր շրջված աթոռների ու սեղանների մեջ: Վնասվածք չուներ, բայց անգիտակից էր: Սկսեցի սրտային ռեանիմացիա անել, բայց երբ բացեցի վերնաշապիկը, տեսա 4 գույնի լար՝ սպիտակ, սեւ, կարմիր եւ նարնջագույն, հասկացա, թե ով է նա: Այդ պահին դեպքի վայր ժամանեցին հրշեջները, նրանցից մեկն ինձ ծանոթ էր, մոտեցա ու ասացի նրան, թե ինչ եմ տեսել հենց նոր: Նա միանգամից սկսեց բղավել, որ հարկավոր է բոլորին տարհանել սրճարանից»:
Դրանից հետո Դավիդը չի տեսել՝ ինչպես է Աբդեսլամը ոտքի կագնել ու մտել ռեստորան: Բուժեղբայրը դրսում է եղել, երբ ահաբեկիչը ռեստորանի ներսում պայթեցրել է ինքն իրեն: Դավիդը Reuters-ին պատմել է, որ չի հավատում, որ առաջին օգնություն է ցուցաբերել մի մարդու, որը պատրաստվում էր պայթեցնել իրեն, եւ որ ինքը կարող էր պայթել այն պահին, երբ փորձում էր ռեանիմացիայի ենթարկել նրա սիրտը:
Reuters-ը նաեւ հրապարակել է սիրողական տեսանյութ, թե ինչպես է բուժեղբայրը առաջին օգնություն ցույց տալիս ահաբեկչին: