Թող խաղաղվեն Սեֆիլյաններն ու մյուս երեւույթները. էս երկրում խժդժություն չի լինի: Այս մասին, այսօր՝ դեկտեմբերի 6-ին, սահմանադրական փոփոխությունների հանրաքվեին թիվ 9/14 ընտրատեղամասում քվեարկելուց հետո մի խումբ լրագրողների հետ զրույցում հայտարարեց ՀՀ ոստիկանապետ Վլադիմիր Գասպարյանը՝ անդրադառնալով Ազատության հրապարակում իշխանափոխություն իրականացնելու մասին հնչող կոչերին:
«Օրենքից ցանկացած շեղում շատ խիստ եւ արագ կպատժվի»,-հավելեց նա:
Հարցին, թե հնարավո՞ր է, իրավիճակն այնպես փոխվի, որ նորից «Ժառանգության» առաջնորդ Րաֆֆի Հովհաննիսյանի հետ գնա աղոթելու, ՀՀ ոստիկանապետը պատասխանեց. «Շատ հնարավոր է: Աղոթքից պետք չի խուսափել, չաղոթողներից է պետք վախենալ»:
Դիտարկմանը, թե շատերի կարծիքով, այդ աղոթքով արջի ծառայություն մատուցեցիք Րաֆֆի Հովհաննիսյանին, նա արձագանքեց. «Ես ոչ մեկի ծառայություն չեմ մատուցում, բացի իմ հայրենիքից: Իսկ թե ով ինչ է մտածում, դա իրենց մտավոր ունակությունների խնդիրն է: Աղոթքից պետք չի ամաչել: Ես աղոթում եմ օրական տասնյակ անգամ, երեւի: Չափը չգիտեմ»:
Նշենք, որ Հայաստանում այսօր՝ դեկտեմբերի 6-ին, ժամը 8։00-ին մեկնարկել է սահմանադրական փոփոխությունների հանրաքվեն։
Քաղաքացիները կքվեարկեն հանրապետության ամբողջ տարածքում բացված 1988 ընտրատեղամասերում։
Նշենք, որ Հայաստանի Հանրապետության անկախությունից հետո առաջին Սահմանադրությունն ընդունվել է 1995թ. հուլիսի 5-ին, որը ամեն տարի նշվում է որպես Սահմանադրության օր: Սահմանադրությունը փոփոխվել է 2005թ. եւ նախագահական կառավարման համակարգը փոխարինվել է կիսանախագահականով: Այժմ հանրաքվեի դրված նախագծով երկիրն անցում է կատարում կառավարման խորհրդարանական համակարգի:
