Եթե կան մարդիկ, որոնք Սահմանադրական փոփոխությունների հանրաքվեի օրը ընտրախախտումներ են արել, պատասխանատվության կենթարկվեն: Այս մասին այսօր՝ դեկտեմբերի 7-ին, Գյումրիում մի քանի լրագրողների հետ զրույցում ասաց Հայաստանի վարչապետ, «Այո»-ի կենտրոնական շտաբի ղեկավար Հովիկ Աբրահամյանը:
«Ժամանակ կա, թող քննեն պատկան մարմինները, եթե իրոք եղել են ընտրախախտումներ, այդ մարդիկ կկրեն պատասխանատվություն»,- ասաց վարչապետը:
Լրագրողների դիտարկմանը, թե հանրաքվեին քաղաքացիների մասնակցությունը բավականին ցածր է եղել, Հովիկ Աբրահամյանն արձագանքեց. «Մոտ 63 տոկոսն «Այո» է ասել, հազար կամ տասը հազար ձայնի տարբերություն չէ: Յուրաքանչյուր մարդ իրավունք ունի ասելու «Այո» կամ «Ոչ», յուրաքանչյուր մարդ ինքն է որոշել՝ ինչպես քվեարկել»:
Նշենք, որ դեկտեմբերի 7-ին վաղ առավոտյան ԿԸՀ նախագահ Տիգրան Մուկուչյանը հայտնել է, որ հանրաքվեի քվեարկության ժամանակ «Այո» է քվեարկել ընտրողների 825 851 ընտրող (63,35 տոկոսը), «Ոչ»՝ 421600 ընտրող (32,35 տոկոսը):
Անվավեր քվեաթերթիկների թիվը կազմում է 53 332, անճշտությունների թիվը՝ 824:
Ըստ արձանագրություն՝ Հանրաքվեի մասնակիցների հիմնական ցուցակներում ընդգրկված քաղաքացիների թիվը՝ 2 միլիոն 547 հազար 918 է: Հանրաքվեին մասնակցելու իրավունք ունեցող քաղաքացիների ընդհանուր թիվը՝ 2 միլին 567 հազար 047: Նույնականացման քարտերով քվեարկության մասնակիցների թիվը՝ 189 հազար 230 է:
Հիշեցնենք, որ Հայաստանի Հանրապետության անկախությունից հետո առաջին Սահմանադրությունն ընդունվել է 1995թ. հուլիսի 5-ին, որը ամեն տարի նշվում է որպես Սահմանադրության օր: Սահմանադրությունը փոփոխվել է 2005թ. եւ նախագահական կառավարման համակարգը փոխարինվել է կիսանախագահականով: Այժմ հանրաքվեի դրված նախագծով երկիրն անցում է կատարում կառավարման խորհրդարանական համակարգի: