Հայաստանը չպետք է վախենա ՄԱԿ-ում Ադրբեջանի կողմից ներկայացված բանաձեւերից, այլ պետք է դրանք օգտագործի ի նպաստ Հայաստանի: Այս մասին սեպտեմբերի 8-ին լրագրողների հետ հանդիպման ժամանակ հայտարարեց Հայաստանի ռամկավար ազատական կուսակցութան (ՀՌԱԿ) ատենապետ Հարություն Առաքելյանը: Նա նշեց, որ Հայաստանը ԵԱՀԿ Մինսկի խմբի շրջանակներում ընթացող գործընթացին զուգահեռ պետք է գործընթաց սկսի նաեւ ՄԱԿ-ում եւ ներկայացնի, որ 1988-1994 թթ. Ադրբեջանում հայերի նկատմամբ տեղի է ունեցել ցեղասպանություն: «Մենք պետք է ճանաչենք ԼՂՀ անկախությունը, ԼՂ հարցը տանենք ՄԱԿ-ի ներքո գտնվող միջազգային դատարան եւ ԼՂ ազատագրված տարածքները պահանջենք որպես ցեղասպանության փոխհատուցում»,-ասաց Առաքելյանը: ՀՌԱԿ ատենապետի խոսքով՝ Հայաստանի այդ քայլը հնարավորություն կտա հակակշռել Ադրբեջանի կողմից արված քայլերին:
«Մենք վաղուց պետք է այդ նախաձեռնությամբ հանդես գայինք, քանի որ մարդիկ զբաղվել են ցեղասպանությամբ եւ նույնիսկ Խոջալուում սպանել են իրենց՝ Ադրբեջանի քաղաքացիներին: Ե՜ւ Ադրբեջանը, ե՜ւ Թուրքիան, գործել են նույն ձեռագրով: Թուրքիայիում 1915 թվականին, իսկ Ադրբեջանում՝ 80-ական թվականներին, կար քրեական օրենսգիրք, որը դատապարտում էր մարդ սպանելը, անկախ այն բանից, թե ի՞նչ ազգություն ունի այդ մարդը: Սակայն, երբ կառավարությունն ասում է՝ այս մարդկանց կարող եք սպանել, թալանել, մյուսներին՝ ոչ, առաջ է գալիս խուժանը եւ իրականացնում ցեղասպանություն: Մենք 1915 թվականին Ցեղասպանության ենթարկվածների վկաներ գրեթե չունենք, սակայն տասնյակ հայ փախստականներ ունենք, ու ընկել՝ ԵԱՀԿ Մինսկի խումբ ենք նեյնիմ-նեյնիմ անում»,-նշեց նա: Առաքելյանը նաեւ հավելեց, որ Հայաստանին միջորդներ պետք չեն, պետք են դատավորներ, քանի որ հայ ազգի նկատմամբ հանցագործություն է կատարվել:
Նշենք, որ ՄԱԿ-ի Գլխավոր ասամբլեայում սեպտեմբերի 9-ին տեղի է ունենալու «Իրավիճակը Ադրբեջանի օկուպացված տարածքներում» բանաձեւի քննարկումը: Բանաձեւը ներկայացվել է Ադրբեջանի կողմից: